Zaninah Arab Club Champions Cup

Cristiano Ronaldo-a'n Al Nassr chu Arab Club Champions Cup-ah final a thlenpui a, zanin dar 8:30 hian King Fahd Stadium, Taif-ah final khelh a ni dawn. India ramah chuan TV channel-a enna tur a awm dawn lo a, Sony Liv aṭangin live streaming-in a en theih ang.

Arab Club Champions Cup hi Union of Arab Football Associations (UAFA) buatsaih a ni a, Arab ramte inelna niin Asian Football Confederation (AFC) leh Confederation of African Football (CAF) hnuaia club-te an tel. Kum 1981 aṭanga ṭan tawh kha a ni a, Ronaldo-a'n a vawi khat nan Al Nassr champion pui a tum dawn.

Manchester United leh Real Madrid forward hlui Ronaldo hian tun inelnaah goal li a khung tawh a, top scorer a ni mek. Al Nassr-ah hming langsar Sadio Mane leh Marcelo Brozovic te an awm bawk.

Al Hilal pawhin Ruben Neves, Sergej Milinkovic-Savic leh Kalidou Koulibaly bakah World Cup 2022-a Argentina laka goal khungtu Salem Al-Dawsari te an kawl. Player an lar miau a, inkhel a châkawm a ni pha.

Saudi Pro League chu nizan aṭang khan khelh ṭan a ni a; Al Nassr hian August 14, Thawhṭanni zan hian match hmasa berah Al Ettifaq an tum lehnghal dawn. Al Ettifaq hi Steven Gerrard a enkawl a ni a, Jordan Henderson leh Moussa Dembele te an awm thung.