Netherlands leh Japan an tla

FIFA Women's World Cup quarterfinal chu nimin khan khelh ṭan a ni a, match hnih khelh a ni–beisei loh result a thleng nghal a, tlang tur zawka ngaih Netherlands leh Japan ten an khingpui ve ve hneh loin an tla! Team pahnih hnehtu Spain leh Sweden te chu August 15 hian semifinal-ah an intawng ang.

World Cup 2019 finalist Netherlands-in a vawi khat nana quarterfinal lut Spain lakah hnehna chan an beisei a, team pahnih an inhnehtawk hle–minute 81-naah Mariona Caldentey chuan Spain tan penalty a khung a, 1-0 a ni.

Hun awm zat ngaihtuahin Spain hi an tlang mai a rinawm. Mahse, Netherlands tan Van der Gragt chuan hun pek belhah si phurh rawn sutin, extra time khelh a ngaih phah. Spanish tleirawl Salma Paralluelo chuan minute 111-naah chakna goal a khung leh ta tho.

Spain coach Jorge Vilda chuan, "Extra time kan khel a, mahse, kan beiseina a thi miah lo," tiin injury time-ah goal chhuah mah se, an beidawn duh loh rah an seng thu an sawi.

Nimin quarterfinal inkhel hnuhnung zawkah champion tawh Japan an tlawm a, USA hnehtu Sweden lakah 2-1 in an chak lo. Sweden hian Amanda Ilestedt leh Manchester City midfielder Filippa Angeldahl (penalty) hmangin goal an khung hmasa a, 2-0 in hma an hruai reng.

Japan tan West Ham midfielder Honoka Hayashi chuan minute 87-naah si phurh a sut ṭhen a, mahse, Japan harh chhuah a tlai a, si phurh an sut zawh hman loh avangin an tla.