Inkhel lo tur Kylian Mbappe?

Paris Saint-Germain lamin Kylian Mbappe chungchangah thutlukna an siam chiang a, contract a pawtsei a nih loh chuan season tluanin a inkhelh ve an phal dawn lo - team training pangngai pawh a zawm ve an phal dawn lo a ni.

Mbappe pawhin tun hnai khan a hma hun a tichiang, season khat daih contract a neih lai chu pawhsei a tum lo a, a club awm mekna PSG aṭanga chhuah a tum lo bawk; club leh player ngaihdan a inpersan chiang hle.

Season hmasa khan Real Madrid sawmna hnawlin Mbappe hian Paris club tan contract a ziak thar, season khat atana pawhsei theih la ni mah se pawhsei a tum tawh lo thung - PSG lamin a thlawna chhuahtir ai chuan hralh ngei an tum thung.

An inhmuhthiam loh chhan hi sawi dan hrang hrang a awm. Skysports tarlan dan chuan, contract a ziah dawn khan PSG hian Robert Lewandowski leh Bernardo Silva te lakluh an tiam a, mahse hei hi PSG hian an tihlawhtling leh thei si lo tih a ni.

Tuna an ngaihdan ang hian kaltlang ta se, season khat chhung France captain hi a inkhel dawn lo a ni satliah lo a, senior team training zingah pawh a tel dawn lo. Euro 2024 khel tur France tan a pawi thei ang.

Mbappe chauh ni loin PSG hian Neymar chungchang pawh an chinfel a ngai dawn. Brazilian forward hian chhuah a duh a, khawvel player man tam ber hi pound maktaduai 80 bawra ngamtu an awm chuan Paris club lam pawhin an hralh hreh lo niin an sawi.