Gerrard hoa Europa League khel tur Rangers
Steven Gerrard enkawlna hnuaiah Rangers-in an nep lo tih an phoan chhunzawm zel a, Turkish club ṭha Galatasaray chu 2-1 a hnehin Europa League group stage an inhlangkai.
Scottish club tan hian Scott Arfield leh James Tavernier-te chuan second half-ah goal khat ve ve an khung a, hun tawp nan minute thum chauh a awm tawh tihah Galatasaray hian defender Marcao hmangin goal khat khung ve mah se si phurh sut zo turin hunin a daih tawh lo.
Rangers hian inelna hrang hranga match 11 an khelh tawhah tlawm an la nei lo a, Gerrard hnuaia Europa League qualifier match 19 an khelh tawhah tlawm an la nei miah lo bawk - Liverpool legend hnathawh hian fak a phu hle.
Kum 40 mi Gerrard chuan, "Kum thum chhung a zawna Europa League group stage khelh theih hi a ropui a, mahse he team min teh hun tur chu May-ah a ni. He club hi hlawhtlinna hmanga din a ni a, chu hlawhtlinna chu nomawi a ni," tiin Rangers-ah champion a duh thu a sawi.
Scottish champion Celtic chuan an mikhualna ramah 1-0 a FK Sarajevo hnehin Europa League group stage an inpetkai ve bawk a, French striker Odsonne Edouard chuan Bosnian club lakah hian he inkhela goal awmchhun hi a khung.
European club lian zingah AC Milan chu Europa League khel turin an inpetkai bawk a, hun pangngaiah Rio Ave nen 2-2 a an inhnehtawk hnuin penalty hmangin 9-8 in an chak.
Milan hian an mikhualna ramah Alexis Saelemaekers goal hmangin hma hruai mah se Ave hian Francisco Geraldes hmangin an chhanglet a, extra time-ah Gelson hmangin hma an hruai zui.
Mahse, Italian club hian extra time-ah pawh minute 120 pelh hnua Hakan Calhanoglu penalty hmangin si phurh an sut a, penalty hmanga chak zawk zawn niin 9-8 in an chak zui a ni.
Nimin tlai khan Europa League group stage draw hi neih nghal a ni a, Rangers hi group D-ah Benfica, Standard Liege leh Lech Poznan te nen awmin AC Milan hi Celtic nen group H-ah an awm a, Italian club awmnaah hian Sparta Prague leh Lille te an awm bawk.
Premier League club Arsenal chu group B-ah Rapid Vienna, Molde leh Dundalk te nen an awm a, Leicester chu group G-ah Braga, AEK Athens leh Zorya Luhansk te nen an awm.
Jose Mourinho enkawl Tottenham Hotspur tan hna a awlsam dawn angin a sawi theih a, Spurs hian group J-ah Ludogorets, LASK leh Royal Antwerp an awm pui.
Europa League group stage
Group A: Roma, Young Boys, Cluj, CSKA Sofia
Group B: Arsenal, Rapid Vienna, Molde, Dundalk
Group C: Bayer Leverkusen, Slavia Prague, Hapoel Beer-Sheva, Nice
Group D: Benfica, Standard Liege, Rangers, Lech Poznan
Group E: PSV Eindhoven, PAOK, Granada, Omonoia
Group F: Napoli, Real Sociedad, AZ Alkmaar, Rijeka
Group G: Braga, Leicester, AEK Athens, Zorya Luhansk
Group H: Celtic, Sparta Prague, AC Milan, Lille
Group I: Villarreal, Qarabag, Maccabi Tel-Aviv, Sivasspor
Group J: Tottenham, Ludogorets, LASK, Royal Antwerp
Group K: CSKA Moscow, Dinamo Zagreb, Feyenoord, Wolfsberger
Group L: Gent, Red Star, Hoffenheim, Slovan Liberec