Liverpool-in Brewster hralh dawn

English striker beisei-awm ber pawl Rhian Brewster chuan Liverpool a khelhna hmun a chan loh avangin Sheffield United a zawm dawn a, he thuziak i chhiar meuh chuan contract a ziak fel tawh hial ang. 

Kum 20 mi striker manah hian club pahnih an inrem tawh a, Sheffield hian an club chanchina player manto ber ni turin pound maktaduai 23.5-in Brewster hi an lalut dawn a ni. 

FIFA Under 17 World Cup 2017 a Golden Boot dawngtu striker hi Liverpool-in ui tak chunga an hralh a nih avangin buy-back clause a awm thlap a, Reds hian an duh chuan kum thum chhungin an lei let thei ang a, Sheffield hian an hralh chhawng leh a nih chuan a man aṭangin 15% an dawng tel bawk ang. 

Liverpool academy chhuak defender hian Reds tan match li chiah a khel hman a, Community Shield a Arsenal nen an inhmachhawn ṭum khan bench aṭanga luhtir ni mah se penalty shootout a Reds player goal khung lo awmchhun a ni. 

Brewster hian season hmasa khan loan-in Swansea City-ah hun a hmang a, inelna hrang hrangah match 22 khelin goal 11 a khung - tun season Premier League a goal la khung lo Sheffield tan danglamna thlen turin a ṭha tawk. 

Tun season league match thuma la tlawm vek Sheffield hian Pathianni zan dar 6:30-ah Arsenal an lenchilh dawn.