Pirlo hmaa ding tur Gattuso

Italian midfielder ropui ni ṭhin pahnih Andrea Pirlo leh Gennaro Gattuso ten inkhelh an chawlhsan tawh a, tunah chuan team enkawltu an ni tawh - an vanglaia inkawp rem tak hi Pathianni zan hian an intawng dawn.

Pirlo-a enkawl Juventus hmachhawn turin Gattuso kaihhruai Napoli chu Allianz Stadium-ah an lenglut dawn a, manager an nih china an intawn hmasak ber tur a nih avangin ngaihven a hlawh hle.

Serie A season kal laiah Napoli hian match hnih khelh tawhah point ruk hmuin hma an hruai, champion lai Old Lady erawhin point li an neih avangin parukna an ni, zaninah Turin club hian hnehna an chang a nih erawh chuan an khum thei dawn.

Player an nih lai khan Pirlo leh Gattuso te hi hun rei tak chhung AC Milan tan an khel dun a, hlawhtlinna pawh an chang nual. 2006 FIFA World Cup-ah khan an ram Italy chu hlawhtlinna chanpui bawkin, football huanga nomawi hlu bera ngaih chu an lo chawi dun tawh.

Team enkawl lamah chuan Gattuso-a'n tawnhriat a ngah tawh zawk, a club hlui AC Milan a enkawl tawh a, chumi hnuah Napoli kaihruai lehin season hmasa khan Coppa Italia nomawi a chawi, final a an hneh chu Juventus an ni.

Pirlo erawh team enkawl kawngah a patuai hret - manager puitling a nih hnuah a naute match hnih chauh a la kaihruai. Amaherawhchu an player neih dan thlir chuan tun ṭuma an intawn turah hian Pirlo hi chak tura rinkai zawk a ni ang.

Gattuso chuan, "Juventus a enkawl nghal thei hi a vanneiin ka lawmpui hle, chutihrualin a chona hmachhawn tur hi a hautak ve hle ang tih ka ring. Player nih laia nuamti taka inkhelh ngawt ang kha a ni thei tawh lo tih erawh a hrethiam ve thuai dawn.

"Coach nih chuan inkhel zir chian a ngai a, match khelh tawh leh khelh hmabak ngaihtuah tur a tam avangin zan mu thei loa tlaivar zak zak a ngaih chang a awm," tiin player nih aiin coach nih hnuah rilru hman a ngaih nasat thu a sawi.