GIG Motors I Day Football Semifinal: Aizawl FC leh Police danglamna Munez

GIG Motors I Day Football semifinal-ah Aizawl FC-in 2022 final-a an hneh loh Mizoram Police chu August 12, Inrinni khan RG Stadium-ah 1-0 in an hneh a, Lalmuanawma'n (Munez) hun tawp dawnah goal awmchhun a khung.

I League club Aizawl FC hian August 15, Thawhlehni chawhnu dar 2:00 hian Chhinga Veng nen RG Stadium-ah final an khel ang. AFC leh Lalsangzuala Hmar kaihhruai Chhingcows te hi an group-ah pakhatna ve ve an ni a, team ṭha pahnihin final an khel dawn tia sawi theih an ni.

A hmuhnawm

Mizoram Police-in match thum lekah goal sarih ngawt an chhuah a, goal 11 khung thei Aizawl FC an hmachhawn ṭumah erawh an zia an chhuah.

Lalbiaksanga Colney-in tlarhnung a rem ṭha a, Lalhmunmawia (Ahmuntea) leh a ṭhianten goal li khung thei AFC forward Lalrinzuala an dah ṭha.

Police goalkeeper F. Lalmuanawma a dam tawh a, Mizoram keeper a che ṭha. Aizawl FC forward R. Lalthanmawia (Amawia) freekick pet ṭha zeta a dan bakah save ṭha dang a nghah.

Police lam vanneih ṭum ni se goal khung theihna tur an nei ve bawk. Midfielder talent ṭha bik R. Malsawmtluanga'n box pawn chiah aṭangin freekick vawi thum a pet a, goal-ah a chantir lo vek.

Bench aṭanga lut F. Lallawmkima leh F. Lalnuntluanga ten Police attack ti na sawt mah se Aizawl FC tlarhnung a khawng ve tlat.

A hunah Munez

Kumin I Day Football-ah Aizawl FC tlarhma hming a langsar a, hun pawimawhah Republic Veng tlangval Munez leh Mission Veng tlangval Rohmingthanga te inkawp an che ṭha.

Rohminga hian Police forward Lawma goal khung tur ṭha takin a dang a, Munez hian chakna goal a khung thung. Minute 88-naah corner kick aṭanga ball kal Lalramsanga tauh let chu Munez-a'n a tauh goal.

Police hian siphurh sut tumin na takin an nawr a, Ahmuntea'n goal khungah inngai hman mah se a kut a hman avangin pawmsak a ni lo. Coach Victor Lalbiakmawia enkawl Aizawl FC 1-0 in an vannei ta zawk.