Chanmari aiin Chhinga Veng an ṭha hret

I Day Football semifinal hmasa zawk a hmuhnawm a, a hnuhnung zawk a la hmuhnawm mah. Chanmari FC leh Chhinga Veng FC te an inkhel tawk a, hun pangngaiah goal a lut lo. Extra time-ah 1-1 a ni a, penalty shootout-ah Chhingcows 5-3 in an vannei ta zawk.

RG Stadium-a inkhelah hian Chhinga Veng tan forward chhuak thar ṭha Suanngaihmuana'n goal khung hmasa mah se Lalkhawpuimawia goal ropui hmangin hun tawp hma hretin Chanmariin siphurh an sut. Lalsangzuala Hmar hote penalty shooout-ah an chak a, hnehna an chan danah inchhuang thei an ni lo thung.

Chutihrualin Chhinga Veng hi an squad a chhah tawk lo a, MPL-a an chhawr tur player ṭhenkhat hmun danga an la khelh avangin bench-ah an tlem. Heti chung hian tun inelnaah ṭha takin an khel a, coach Sanga'n a player neih ang a hmang thiam hle.

Chanmari lam hi group match hnuhnung ber aṭangin an insiamṭha ṭan a, Chhinga Veng nen an inkhel tawk. Chhingcows keeper RS Lallawmzuala'n dang hnem lo se chak thei hial dinhmunah an ding.

Hun pangngaiah goal a lut lo a, Chhinga Vengin counter attack hmangin an vaw let. Captain MS Dawngliana leh Johny Lalremruata te thawhrah sengin Amuana'n minute 106-naah goal hmahruai a khung. Chhingcows chak turah an inngai a, Chanmari defender K. Lathlahlova (K. Patea) hnawhchhuah ni mah se player 10-a khel K. Malsawmkima hote an beidawng lo.

Extra time-ah pawh injury time-ah Kelkang tlangval Lalkhawpuimawia'n box chhunga ball vawrhluh chu a chest kan hnuah a back volley lut - goal ropui bik a ni.

Penalty shootout-ah Chanmari forward Vincent Lalduhawma'n a pet over a, Chhinga Veng tana Johny pet chu Malsawmtluanga'n dang mah se Chanmari keeper hian goalline a pel hman. Johny hian pet ṭhat lehnaah a pet lut a, Chhinga Veng tana pettu dang zawngin pet goal vek bawkin 5-3 in an chak.