Arsenal chakna Saka leh Nketiah

Bukayo Saka-a goal mawi leh Eddie Nketiah-a khung hmangin Arsenal chuan an mikhual Nottingham Forest 2-1 in an hneh. Mikel Arteta nauten duhthusama ṭhain la khel lo mah se Premier League bul an ṭan fuh.

Ticket lei leh hralh chungchangah harsatna a awm avangin inkhelh hun hi darkar chanvea sawn tlai a ni a, hun ruat sa dar 5:00-ah chuan Emirates Stadium pawnah ticket neitu tam tak an la awm, hei vang hian sawn tlai a ni.

Arteta-a'n nipui bazara a lei Declan Rice, Kai Havertz leh Jurrien Timber te chuan inkhel bul an ṭan vek a, tlarhma laiah Nketiah a awm. Hale End chhuak striker hian minute 26-naah Gabriel Martinelli hnen aṭanga a ball hmuh a khung.

English striker hian awmna tur a thlang fuh viau a, box chhungah chiai loin keeper Matt Turner tana dan theih lohin a khung a, chawlhlawk hmain Saka chuan box pawn aṭangin goal mawi zet mai a thlawh lut a, chak tur a chiang der tawhah a ngaih theih.

Mahse, Forest lam an beidawng duh bik lo - Arsenal ṭhat tawk lohna lai an zawng reng, minute 82-naah counter attack aṭangin an vaw let thut a, substitute Anthony Elanga-a'n thui zet ball a tlanpui hnuah Taiwo Awoniyi tan a siamsak a, goal khat an sut.

Hun tawp dawn lamah goal neih belh tumin team pahnih an innawr tawn a, Gunners captain Martin Odegaard leh Rice te an vannei tawk lo. Rice hian shot ṭha zet vawi thum lai nei mah se Gunners keeper hlui Turner chuan a lo dansak vek.

Arsenal tana chanchin lawmawm lo pakhat chu Timber inhliam kha a ni, pound maktaduai 34 man Ajax defender hlui hi chawn hliam vanga lak chhuah a ngai a, a chawlh chen tur hriat a la ni lo - Takehiro Tomiyasu an la neih avangin chiaina tur erawh a awm rih lo ang.

Gabriel Jesus a inhliam a, kar hmasa lawka Community Shield an khelhah Arsenal manager Mikel Arteta chuan Nketiah aiin tlarhma laiah Havertz a luhtir zawk. EPL-ah erawh Havertz hi midfield-ah pawt letin Nketiah zawk hi hmatawngah dah a ni.

Arsenal manager Mikel Arteta chuan, "Manchester City laka inkhel bul a ṭan loh avang khan Nketiah a lawm lo hle a, mahse a lawm lohna chu training-na hmunah theihtawp chhuah phah nan a hmang ta zawk.

"Hmun chang tura a beihna leh chet dan khan min tilawm, chuvangin Nottingham Forest hmachhawn tura thlan a ni," a ti a, a chet dan chu player dangte tan pawha entawn tlak a nih thu a sawi bawk a ni.

Season hmasa khan Jesus inhliam hnuah pawh Arteta-a'n Bukayo Saka, Leandro Trossard leh Gabriel Martinelli te a ring zawk tlat a, striker Nketiah tan hmun a awm hleithei lo, league match pakuaah chiah bul a ṭan hial.

Kum 24 mi Nketiah chuan, "Arsenal hi ka seilenna hmun a ni a, engtik lai pawhin ka thlawp reng ang. Player zawng zawngin inkhelh kan duh vek a, khelmual chhunga luh vek theih erawh a ni lo, midang ang bawkin a ṭul huna chhawr theih turin ka inpeih reng," a ti.