Kum 38 mi Ronaldo a la vul zel

Cristiano Ronaldo chuan Al Nassr chu an la champion ngai lohna Arab Champions Cup-ah a champion pui a, Portuguese striker hi a che ṭha satliah lo - King Fahd Stadium-ah thilmak a lantir.

August 12, Inrinni zan khan Al Hilal leh Al Nassr ten final an khel a, Saudi Arabia club pahnihah Al Hilal-in sulhnu an nei ṭha zawk.

Al Hilal hian Kalidou Koulibaly, Rúben Neves, Sergej Milinkovic-Savic bakah Brazilian forward pahnih Michael leh Malcolm te an kawl. An captain pawh World Cup 2022-a Argentina lama chakna goal khungtu Salem Al-Dawsari a ni.

Al Nassr pawhin Ronaldo bakah Sadio Mane, Marcelo Brozovic leh Alex Telles te an nei bawk. Team ṭha pahnih inkhel an ni bawk a, entu an ṭhahnem. Ronaldo a tel miau avangin khawvelin a ngaihven bawk.

Al Hilal an chungnung hret. Minute 51-naah Michael-a'n Al Hilal hmahruaina goal a khung a, Ronaldo goal khung lawm dan angin a lawm.

Al Nassr ben harhin an awm a, an goal bawh a na sawt. An nawr nat luat an tuar a, minute 71-naah Abdulelah Al-Amiri chu Malcom-a goal khung tur a tihtluk avangin an hnawt chhuak.

Player 10-a an khelh hnuah Ronaldo-a'n si phurh sutna goal a khung a, inkhel boruak a ṭang Al Nassr player Nawaf Boushal-a'n red card a hmu leh, technical area-a awm a nih avangin an tlem belh tawh lo. Ronaldo erawh boruak a sang a, a tal hiar telh telh.

Ronaldo goal khung belh chu offside vangin pawm a ni lo a, hun pangngaiah chak zawk an awm lo. Extra time-ah Ronaldo-a'n chakna goal a khung a, player tlem zawk chungin an ṭangtluan bawk.

Karim Benzema, Sadio Mane leh player ṭha dang telna Arab Champions Cup-ah Ronaldo-a'n goal ruk khungin top scorer a ni a, golden boot a dawng bawk. Ronaldo hian hlawhtlinna ropui tak tak a nei tawh a, chutihrualin tun ṭum final-ah hian a chet ṭhat em avangin a sulhnu ropuite huanga dah tel tlak a ni ang.

Al Nassr hian zanin dar 11:30 hian Steven Gerrad-a enkawl Al Ettifaq chu Saudi Pro League match hmasa berah an hmachhawn ang.