Zaninah Man United an inlan dawn

Manchester United chuan Erik Ten Hag-a hoa nipui bazar ṭha taka an hman hnuah zanin dar 12:30 hian Wolverhmapton Wanderers nen Old Trafford-ah tun season atana Premier League match hmasa ber an khel dawn.

Denmark striker Rasmus Hojlund erawh a inkhel en châktu tam mah se a la inpeih lo. Dutch manager Ten Hag chuan, "Harsatna chhe tê a nei a, player dang a la tluk pha lo. A inpeih thuai theih nan theihtawp kan chhuah ang," tiin a sawi a, Wolves lakah a inlan lo ang.

Hojlund khel lo mah se player thar goalkeeper Andre Onana leh midfielder Mason Mount te chu entute mit fukna tur a ni a, chutihrualin captain thar Bruno Fernandes leh nikum lama innghahna Marcus Rashford te chu player pawimawh an ni zui ang.

Wolves erawh inelna ṭan hmain an inpeih hman lo. Spanish manager Julen Lopetegui a bang a; August 10, Ningani khan a thlak nan Gary O'Neil an puang. Season liam ta khan Wolves hi 13-naah an awm a; player hming langsar Ruben Neves, Adama Traore, Conor Coady, Nathan Collins leh Raul Jimenez te an chhuak.