Kane leh nomawi - hrang tura duan!

England captain Harry Kane chuan nomawi duhin Bayern Munich a pan a, nomawi chawi theih hmasak ber a bawhpelh nghal. Bundesliga champion Bavarians hian August 12, Inrinni zan khan German Super Cup-ah RB Leipzig 3-0 in an hneh lo.

Kum 30 mi Kane hian a football career-ah nomawi a la chawi ngai lo a, vanneihna beiseia Bavarians a zawm hnuah pawh a record duhawm lo tak hi a la thai chhe thei lo.

Tunah rih chuan Kane leh nomawi hi hrang tura duan a ni a, chutihrualin Bayern hian nomawi chawi loa season khar an neih ngai meuh loh avangin English striker hi nomawi chawi ve thuai tura ngaih a ni. Kane hi Bayern kawr hain a inkhel tawh a, chutihrualin nimin tlai khan official-in an pho chhuak chauh!

€100m man

Harry Kane hi kum 2021 khan Manchester City nen sawizawm an ni a, Spurs-in an chhuah duh lo. Tun nipui transfer inhawntirh khan Manchester United leh Real Madrid nen sawizawm an ni a, Bayern Munich an rawn lang leh bawk.

Kane hian nomawi la chawi lo mah se Spurs tan match 435-ah goal 280 a khung thei a, club tana goal khung tam ber a nih avangin a record hi a chhuanawm hle. Hei bakah hian English striker hian England tan sulhnu ṭha tak a nei bawk.

Bayern leh Spurs te hun rei tak an indawr hnuah euro maktaduai 100 (£86.4m) in an inrem a, kum li daih contract a ziak bawk. Kane hian Inrinni zingah training a zawm nghal a, nomawi chawitir nghal an tum.

A la hun lo

England captain hi Bayern a zawm aṭanga darkar tlemte hnuah German Super Cup khel tur squad-ah telh nghal a ni a, beisei ang result erawh a thleng lo.

Allianz Arena-ah Kane aiin Dani Olmo a langsar ta zawk. Spanish forward hian first half-ah goal hnih a khung a, halftime-ah 2-0 a ni. Minute 64-naah Thomas Tuchel-a'n Leipzig lehthal ngei tumin Kane a luhtir a, Bayern ṭantute player thar lawmin an thawm a ṭha hle.

Mahse, Kane hian goal khung chu sawi loh - ball vawi thum chauh a khawih. First half-a goal hnih khungtu Olmo-a'n hattrick siamna goal a khung a, Bayern-in an mualah 3-0 ngawtin RB Leipzig an hneh lo.

Bayern manager Thomas Tuchel chuan, "Kan khelh dan thlir khan kar li liam ta chhung khan engmah hna thawk lo ang kan ni. Player-te khan kan khelh dan tur hmang an hre hlawl lo a, kha kha a lungchhiatthlak lai ber a ni," tiin a sawi.

Leipzig tan erawh hnehna a hlu bik a ni a; an player pawimawh Josko Gvardiol, Dominik Szoboszlai leh Christopher Nkunku te an chân chungin 3-0 ngawtin Bayern lakah an chak a ni.