UEFA Men's Player of the Year Award dawngtu Robert Lewandowski

UEFA Men's Player of the Year chu Bayern Munich striker Robert Lewandowski hnehah an hlan. Polish striker hian  Ballon d'Or a la dawng ngai lo a, UEFA Men's Player of the Year Award pawh hi a vawi khat dawnna a ni. Chawimawina semna hi October 1, Ningani zan khan Champions League group stage draw rualin Geneva, Switzerland-ah neih a ni.

Kum 32 mi Lewy chuan, "Beiseina chu chawlhtir ngai suh. Chawimawina hlu tak ka dawn avangin ka lawm a, ka tan chuan zan chhinchhiahtlak a ni. Chawl thei ka la ni lo a, Bayern Munich tan kan chhunzawm zel ang," tiin a hnathawh hriatpui a nih tak avanga a lawmthu a sawi.

Lewandowski hian vote 477 a hmu a, a hnuaia awm mi pakua  Kevin De Bruyne, Manuel Neuer, Lionel Messi, Neymar, Thomas Muller, Kylian Mbappé, Thiago, Joshua Kimmich leh Cristiano Ronaldo te vote hmuh zat belhkhawm 420 aiin a hmu tam zawk. Polish striker hian chawimawna dawn a phu a, a vanduaina erawh kuminah Ballon d'Or sem a ni dawn lo a, Men's Player of the Year Award-ah a lungawi a ṭul dawn.

Season liam ta khan Bayern Munich-in nomawi lian tham pathum an chawi a, Lewandowski hi top scorer a ni vek. Polish striker hian Bundesliga-ah goal 34, Champions League-ah goal 15 leh DFB Pokal-ah goal ruk a khung a, inelna hrang hrangah assist vawi 10 a nei bawk.

Bavarians striker Lewandowski chuan, "Ka rilru put hmang hi thuin ka sawifiah thiam lo. Ka tan chuan chawimawina hlu bik a ni a. Ka teammate-te, Bayern-a hnathawk-te leh kawng engkima min thlawptu ka chhungte chungah lawmthu ka sawi. Ka naupan laiin Champions League-a champion hi ka suangtuah ṭhin a, Bayern Munich-in min tih hlawhtlinpui hi ka lawm a, ka chhuang bawk," tiin chawimawina dawn zanah a khelhpuite a hre reng.

Lewy hian season liam ta khan inelna lian pathumah match 47 khelin goal 55 a khung a, 2019-20 season chhung khan amah hnaih bertu aiin goal 16-in a khung tam zawk. Bayern striker hi 'forward of the season'-ah thlan a ni bawk. 

UEFA Men's Player of the Year award thlangtute hi coach leh journalist bakah UEFA hnuaia ram aiawh aṭangin pakhat ṭheuh an ni. 

Vote nei pha hi coach 80 an awm. 2019/20 UEFA Champions League group stage (32) leh UEFA Europa League group stage-a (48) coach te an ni a, journalist-te hi European Sports Media (ESM) group-in a thlanchhuah mi 55 te an ni.

Vote nei chin hian player pathum an thlang a, pakhatnain point nga hmuin, pahnihnain point thum leh pathumnain point khat an hmu. Coach-te hian anmahni enkawl player an thlang thei lo.

Vote thlaktute hian player-te hi club leh ram tana season khat chhunga an khelh dan an thlir.

Player of the Year:    Robert Lewandowski

Coach of the Year:    Hansi Flick

Goalkeeper of the Season:    Manuel Neuer

Defender of the Season:    Joshua Kimmich

Midfielder of the Season    :Kevin De Bruyne

Forward of the Season:    Robert Lewandowski

UEFA President’s Award:    Didier Drogba

Player of the Year:    Pernille Harder

Coach of the Year:    Jean-Luc Vasseur

Goalkeeper of the Season:    Sarah Bouhaddi

Defender of the Season:    Wendie Renard

Midfielder of the Season:    Dzsenifer Marozsán

Forward of the Season:    Pernille Harder