Messi-a'n goal riat a khung dêr!

Lionel Messi chuan Inter Miami tan match nga a khelh aṭangin goal riat a khung tling der tawh, a club thar hi League Cup semifinal a hruai thleng ta bawk a ni.

Inrinni zing quarterfinal inkhelah Inter Miami hian Charlotte chu 4-0 in an sawp. Josef Martinez, Robert Taylor, Adilson Malanda (OG) leh Messi ten goal khat ṭheuh an khung.

Messi an neih hma khan Miami hian an match hnuhnung 11-ah chak ni hmel an hmu miah lo. Mahse, Messi an neih chinah erawh a zawnin match nga an chak ta, an la chak fai vek tihna a ni.

Major League Soccer an chawlh lailawk lai a ni a, MLS leh Mexican club ten Leagues Cup an khel mek thung. August 16, Nilani zingah Inter Miami hian Philadelphia nen semifinal an khel leh ang.

Inter Miami manager Gerardo Martino chuan, "A hmasa berah chuan ball chang tamin inkhel thunun phawt mai ila kawng a awlsam ṭhin, ball chang tlem zawk kan nih chuan goal khung a harsa," tiin a sawi.