Helenius zalhtu Anthony Joshua

'The Nordic Nightmare' tih meuhin hming lem pe mah se Anthony Joshua hmaah chuan Robert Helenius-a'n eng ruai a ang lo a, round sarihnaah Joshua hian chiang zeta hnek fuhin ring chhungah Helenius a zalh.

Kum 33 mi Joshua hian a hnek na bawk a ni ang - Helenius hi oxygen pek a ngai hial a, mahse, a hnuah erawh zawnchhuah ngai loin ṭha takin ring a chhuahsan thei.

Joshua chuan, "He infiamnaah hi chuan thil a inthlak danglam reng a, boruak leh huhang mai maia talbuai lo tura inpeih reng a ngai. Zaninah ka hna chu ka hlen e," a ti a, a khelh danah a lungawi.

British boxer Joshua hian a zawnin vawi hnih hnehna a chang ve leh ta a, Helenius hma hian April 2023 khan Jermaine Franklin chu a lo tukdawl tawh - vawi hnih a zawna a chak hma hian Oleksandr Usyk lakah a zawnin a tlawm hman.

Mahse, O2 Arena-ah Joshua thawhlehna kan hmu a, chutihrual chuan fans lunglawm erawh a kim lo - Joshua hi January 2024-a Deontay Wilder nen inhnek turin an inbe mek a, fans tam takin Helenius laka a chet dan hi a la tawk zo loah an ngai.

Joshua hi a nihna takah chuan Dillian Whyte nena intawng tura tih an ni. Mahse, amah ang thoa British boxer Whyte hian test a paltlang zawh loh avangin inhnek a hmachhawn thei lo.

Inhnek buatsaihtu lam chuan ticket lei tawhte chu an ticket an thleng theih thu thlengin thuchhuah an siam a, an inthlahrung. Mahse, Joshua a ni miau a, fans lamah ticket kir an awm lo a ni ang - London khawpuia mi 20,000 lenna O2 Arena chu a khat vek!

Mahse, mipui beisei angin Joshua hian inhnek hmuhnawm a chhawp nghal lo. Fourth round-ah Helenius hi hnek fuh mah se, Finnish boxer hi a tlu duh lo a, Wilder-a'n round khatnaa a knockout theih hi Joshua hian a beisei angin a knockout mai lo.

Fans ṭhenkhat chu an thil hmuhah an lawm lo a, boxer pahnih an au el hial. Mahse, round sarihna a thleng a, boxing khawvela a hnek nat em avanga hriat hlawh Joshua hun a inher chhuak.

Olympic 2012 gold medalist hian round sarihnaah a kut dinglamin chiang zetin Helenius a deng fuh a, Finland boxer tan thawh leh ngaihna a awm tawh lo - Joshua a chak a, a hmaah Wilder a ding.

Joshua leh kar khat chiah a awm tawh tiha Joshua a hnek tur thu hretu Helenius te inhnek hi Saudi Arabia lam palaiten a hmunah an en - anni hian nakkum January-ah Joshua leh Wilder chu Saudi-ah inhnektir ngei an tum.

Sum hmanga football khawvel run mektu Saudi hian infiamna dang pawh an luhchilh zel a, boxer pahnihin an hnekchhuah tur hisapin Joshua leh Wilder hian Saudi lam sum mawm hi an hnar phal a rinawm lo - an promoter-te tan pawh hnar a har ang.

Joshua promoter Eddie Hearn chuan, "Knockout of the Year," tiin Joshua chak chungchang hi a sawi a, Hearn chuan sawi zawmin, "Wilder hi a khabeah a hnek fuh a nih chuan engkim a tawp nghal chu a ni mai," a ti!

British boxer tan inhnek vawi 29 a hmachhawna vawi 26 a chakna a ni a, vawi thum a tlawm tawh - kum hnih leh a chanve chhunga knockout hmanga a chak leh hmasak ber a ni bawk.

Joshua hian pound maktaduai 10 vel he inhnek aṭang hian a hlawh chhuak nia sawi a ni a, a hneh tak Helenius hian £1.5mtd a hlawh thung - Helenius hian vawi 37 fight hmachhawnin vawi 32 a chak a, vawi nga a tlawmna chiah a ni.

Ruahman dana Joshua hian Wilder a hmachhawn a nih chuan, £60mtd tal hlawh tura ngaih a ni dawn - tun ṭuma a hlawh nen a inthlau hle. Tun ṭuma a sum lakluh tam tawk loh chhan hi Whyte inlan leh theih loh vang a ni pakhat.