PSG-in first team-ah Mbappe an la let

Paris Saint Germain chuan Inrinni zan khan Ligue 1 season thar an khel ṭan a, tunlaia chanchin ngah tak Kylian Mbappe chuan a hmunah inkhel a en, a team te hi Lorient nen 0-0 in an inhnehtawk.

Lionel Messi a chhuak a, Mbappe leh Neymar te dinhmun chiang loah an awm mek. Coach thar Luis Enrique tan pawh hmalak dan tur hriatthiam a harsa viau mai thei a, khelmual pawn lam boruakin a chiah hneh tih a hriat bawk.

Tlarhma player ṭha Mbappe leh Neymar te tel loa khel PSG hi goal hmaah an hriam tawk lo, defensive midfielder Manuel Ugarte chu goal khung teuh ber a ni a, hun tawp dawna a pet chu goal ban hrulah a liam.

Nimin khan PSG chuan thuchhuah an siam a, first team-a Mbappe an laklet thu an puang. French champion chuan, "Lorient nena inkhelh hmaa inbiakna ṭha tak avangin tukin zing aṭangin Mbappe-a'n first team training a zawm," tiin an puang. French forward Mbappe pawh Paris-ah a cham ngei a rinawm ta.

Paris khawpuia inkhel hi Ousmane Dembele pawhin a hmunah a en, France forward hian Barcelona aṭangin an ram club hi a zawm. PSG hian August 19, Inrinni zanah Toulouse an hmachhawn dawn a, Mbappe leh Dembele te hi an inlan tawh ngei a rinawm.