Real Madrid pan tur Kepa?

Chelsea goalkeeper Kepa Arrizabalaga chuan tun season chhung atan Real Madrid chu loan hmangin a zawm dawn a, a ngheta lei theihna dan erawh an ziak tel dawn lo nia sawi a ni.

La Liga ṭan dawn hun tepter tawh takah Thibaut Courtois a inhliam a, Belgian goalkeeper hi khup vei lam hliam vangin hun rei tak a chawlh a ngai dawn, a chawlh chen tur sawi chian theih ni lo mah se season chawhma lam chuan a inkhel thei dawn lo.

Real Madrid hian senior goalkeeper chhawr tur Andriy Lunin chauh an nei, Ukrainian international hi La Liga an match hmasa berah a inlan a, goal chhuah loin Athletic Bilbao lakah 2-0 in a chakpui.

Spanish club lian hian goalkeeper an mamawhna a sang hle a, club nei loa awm mek David de Gea nen pawh sawizawm an ni bawk. Manchester United a chhuahsan hnuah De Gea hian club thar a la nei lo.