Hey Jude! Real tan Bellingham-a'n goal a khung nghal

Real Madrid chuan Inrinni zan khan Spanish La Liga (2023-24) atana an match hmasa ber an khel a, Athletic Bilbao chu harsatna nei loin khualmualah 2-0 in an hneh.

Madrid khaw club lawmna belhchhah turin player thar Jude Bellingham chuan goal a khung nghal a, Rodrygo chuan goal khat a thawh bawk - mualneitu Bilbao lamin a chhanletna tur an nei lo.

Champion lai Barcelona erawh nizan khan an inlan a, an result kan hre hman lo. Champion tum ngam zinga mi Atletico Madrid chu zanin dar 1:00-ah an inlan ve dawn chauh a, Granada an mikhual ang.

Zirtawpni zan khan inkhel ngaihven hlawhah Valencia chuan Sevilla an lenchilh a, 2-1 in an chak. Valencia tan Mouctar Diakhaby leh Javi Guerra ten goal an khung a, Sevilla tana Youssef En-Nesyri goal khungin awmzia a nei phak lo.

2-0

San Mames-a inkhelah inkhelh ṭantirh aṭangin Real-in an nawr nghal a, minute 28-na lekah Rodrygo chuan Karim Benzema awm tawh lo mah se goal khung an harsat dawn lo, tih pholangin goal hmahruai a khung.

Real tan Vinicius Junior leh David Alaba ten goal khungna hun ṭha an nei bawk a, Bilbao tana si ban nghaktu hi Spain international keeper Unai Simón kher ni lo se, Real hian goal tam zawk an khung ngei ang.

Mahse, Real hi dan reng theih an ni lo. Minute 36-naah Alaba corner aṭanga ball kal chu Bellingham chuan cool zetin goal-ah a chantir a, Simon tan pawh tih theih a awm lo.

Bilbao-in goal hnih an chhuah hnuah si phurh sutna remchang nei mah se an chhawr thei lo a, Ibai Gómez, Oihan Sancet leh Aitor Paredes ten goal khungna remchang nei vek mah se an chhawr lo a, an tlawm.

Hey Jude

Pound maktaduai 88.5 man, a khelh ṭhat dan a zira £115mtd thlenga a man sang chho thei tur Bellingham-a'n Real tana a competitive match hmasa berah goal a khung nghal a, David Beckham (2007) hnua English player zinga Real tana goal khung leh thei hmasa ber a ni.

Beckham pawh hian kum 2003 khan Real tana a league match hmasa berah goal a khung ve bawk. Real manager Carlo Ancelotti chuan, "Bellingham hi chu naupang danglam bik a ni a, a quality a sangin, mi ṭha tak, thawkrim tak a ni - a ṭha a ni tawp mai," a ti a, a lungawi!

Ancelotti chuan inkhel chungchang sawi zuiin, "Kan phurin, kan vaia kan thawhhona a ṭha hle, Kan rilru puthmang a dikin, ball inchuhah a chungnung zawk kan ni zel a, tlarhnung kan veng ṭha bawk.

"Goal kan chhuah lo hi a lawmawm a, first half ṭha tak, second half duhawm tak kan khel a ni," a ti a, inkhel an thunun thei chu a lawm thu a sawi.

Valencia an chak

Sevilla-in Valencia an mikhual a, mikhual team tan Diakhaby chuan minute 60-naah goal hmahruai a khung. Mahse, minute kaw hnu lawkah Sevilla tan goal khung ṭhang En-Nesyri chuan si phurh sutna goal a khung.

Team pahnih an intiat tawk hle. Mahse, minute 81-naah Sevilla player Loic Bade chu hnawhchhuah a ni a, mahni muala khel zawk Sevilla dinhmun a derthawng sawt.

Minute tam a liam hman lo. Hun tawp nan minute hnih chiah a awm tawh tihah Javi Guerra chuan tam zawk an nih chhawr ṭangkaiin Valencia tan goal a khung a, Sevilla tan chhanletna hun a awm tawh lo.

Kum 20 mi Guerra hi Valencia academy chhuak niin, kum 20 mi chauh a la ni a, Spanish midfielder hian hmabak a nei êng hle.