Malaysia hnehin India champion

Hero Asian Champions Trophy chu Inrinni khan a hmawrbawk niin, mipa hockey team hmanga inelnaah hian India chuan Malaysia 4-3 a hnehin an chungnung ber.

Mayor Radhakrishnan Hockey Stadium, Chennai-a final khelhah India tan Jugraj Singh (9'), Harmanpreet Singh (45'), Gurjant Singh (45') leh Akashdeep Singh (56') ten goal khat ṭheuh an khung a; Malaysia lamin Abu Kamal Azrai (14'), Razie Rahim (18') leh Aminudin Muhamad (28') te hmangin goal an nei ve bawk.

Tun hnai kum sarih chhungin India tlangval ten Asian Champions Trophy hi vawi li ngawt an chawi thei a, sulnu an nei ṭha takzet. India bakah hian Pakistan (2012, 2013) leh South Korea (2021) ten hlawhtlinna an chang.

India chief coach Craig Fulton chuan, "Malaysia khan kan chetsual theihna lai tur an hre thei êm êm a, chumi laiah tak chuan min rawn bei ṭhin. Keini lam pawhin an ṭhat tawk lohna lai kan hre ve bawk, ka hmuh dan chuan inkhel inhnehtawk takah a vannei zawk kan ni," a ti.