Goal nga khungtu Newcastle an khawng

Champions League khel tur Newcastle United-in rinhlelhna nena thlirtu nei mah se an ṭha tawk tih an pholang a, tun season-a an league match hmasa berah anmahni ang thoa intuai thar Aston Villa chu 5-1 ngawtin an sawp.

Magpies tan player thar Sandro Tonali chuan minute rukna goal hmahruai khungin, mahse, Villa tan pound maktaduai 50 chuang man Moussa Diaby chuan a club thar tana a goal hmasa ber khung ve bawkin, minute 11-naah si phurh hi a sut.

Villa phur hman viau mah se, an phur chhung erawh rei lo tak a ni - minute 16-naah Alexander Isak chuan hmahruaina goal khung lehin, minute 58-naah a belhchhah bawk.

Eddie Howe-a team ten an duhtawk mai lo. Minute 77-naah Callum Wilson chuan belhchhahin, Harvey Barnes chuan hun pek belhah a khung bawk. Leicester City aṭanga Magpies zawmtu Barnes hian Magpies tana a match hmasa berah goal bakah assist a nei nghal.

Hetihlai hian player an lakluh vang ni lo, an player-te club lian hoin an rim nasat avanga transfer bazar-a an chanchin kan hriat ngun tak Brighton & Hove Albion chu an chak bawk a, anni hian kai thar Luton Town chu 4-1 in an sawp.

Brighton tan Solly March chuan minute 36-naah goal hmahruai a khung a, minute 71-naah pound maktaduai 30-a an lakluh thar Joao Pedro chuan penalty a hlawh chhuak - harsatna nei loin goal-ah a chantir.

Luton hian minute 81-naah penalty hmang vekin an chhanglet a, Lewis Dunk handball vanga an hlawhchhuah chu Carlton Morris chuan goal-ah a chantir a, beiseina thar an nei.

Mahse, Luton hian Brighton an chhaih kawlh a ni ber - player thar Simon Adingra leh kum 18 mi Evan Ferguson ten goal rawn khung ve lehin, 4-1 in Brighton an chak.

West Ham-in Jarrod Bowen-a goal hmangin Bournemouth lakah hmahruai mah se, Cherries hian Dominic Solanke hmanga chhangletin, 1-1 in inkhel a tawp a, Fulham chuan De Cordova-Reid goal hmangin khualmualah Everton chu 1-0 in an hneh bawk.

Roy Hodgson chunga rinna nghat nawn Crystal Palace pawhin point thum nen season bul an ṭan a, Odsonne Edouard goal hmangin kai thar Sheffield United chu 1-0 in an hneh.