England-in semifinal khel dawn

FIFA Women's World Cup 2023 semifinal khel tur a hriat kim ta - Inrinni khan quarterfinal khelh chhunzawm niin, mipui ngaihven hlawh England chuan 2-1 a Colombia hnehin semifinal an lut.

Colombia tan Leicy Santos chuan England lakah goal hmahruai khung mah se, English nulaten goal hnihin an chhanglet - Lauren Hemp chuan first half hun pek belhah si phurh sutna goal khungin, Alessia Russo chuan minute 63-naah a belhchhah bawk.

England hian semifinal-ah France pet chhuaktu leh inelna thlengtu ni bawk Australia an hmachhawn ang. Australia hian Inrinni vek khan France nen quarterfinal khelin, 0-0 in an inhnehtawk.

Minute 120 goal an khung loh hnuah penalty hmangin team pahnih an intum a, hetah pawh hian an inhnehtawk hle - mi 10 ve vein petin, Australia lamah mi pathumin an hlah a, France player paliin hlah ve thungin, 7-6 in mikhual team an tlawm ta zawk.