Bayern kutah mimal chawimawina

UEFA-in 2009-20 season chhunga che ṭhate hnenah October 1, Ningani zan khan Geneva, Switzerland-ah chawimawina a hlan a, Bayern Munich an che ṭha hle. German club hian coach, goalkeeper, defender leh forward ṭha ber chawimawina an dawng a, best midfielder award chiah an hui lo.

Bavarians coach Hansi Flick-a'n best coach chawimawina a dawng a; Manuel Neuer (goalkeeper), Joshua Kimmich (defender) leh Robert Lewandowski (forward) ten an position-ah ṭheuh an dawng bawk. Manchester City midfielder Kevin De Bruyne chu best midfielder-ah thlan a ni thung.

Bayern Munich manager Hansi Flick hian point 476 hmuin amah hnaihtu Liverpool manager Jurgen Klopp (212 points) leh  Leipzig manager Julian Nagelsmann (76 pts) ten an pha lo hle. German manager hian a kaihhruaina hnuaiah Bayern chu UEFA Champions League, Bundesliga, DFB Pokal, UEFA Super Cup leh DFL-Supercup-ah a champion pui vek.

Flick hian nikum November thla khan Niko Kovac a thlak a, Bavarians hi match 40 kaihruai tawhin vawi 36 chakpuiin nomawi panga a chawipui tawh. Tun dinhmunah phei chuan match riat dan zela nomawi pakhat zel chawi ang a ni a, a record hi a ropui hle.

Bayern chet ṭhatna kawngah Flick hi kaihruaitu a ni a, Manuel Neuer, Joshua Kimmich leh Robert Lewandowski te chu hlawhtlinna an channa tura a player pawimawh te an ni. Belgian midfielder De Bruyne (171 pts) pawh hi Bavarians midfielder Thiago Alcántara-a'n (169) point hnih chiahin a pha lo a, Thomas Muller (78) leh Serge Gnabry (46) ten an dawt bawk.

German manager Hansi Flick chuan, "Chawimawina ka dawng hi ka lawm a, ka player-te leh coaching staff dangte zara tel ve chauh ka ni. Kum mak danglam tak kan hmang a, kan inkhel zawng zawngah ka player-ten hna ṭha tak an thawk. Match tinah hma kan sawn a, inrintawkna kan neih belh zel a, a tawpah chuan chak duhna rilru kan put tlat avangin kan hlawhtling ta a ni," tiin a sawi.