UEFA Champions League draw a ngaihnawm Ronaldo leh Messi an intawng dawn

Nigani zan khan Champions League draw neih a ni a, Juventus leh Barcelona group khata an awm ho chuan ngaihven a hlawh hle - khawvela footballer ropui pahnih Cristiano Ronaldo leh Lionel Messi an intawng dawn tihna a ni!

Player pahnih hi La Liga lamah lo intawng fo tawh mah se Ronaldo-a'n Serie A a pan hnua Champions League a an intawng tur hian ngaihven a hlawh lo thei lo - Juve-in Ronaldo an lak chhan hi European champion nih an duh vang a ni a, Messi-a'n Barca tana Champions League nomawi chawi nawn a châkzia lah kan hai lo. 

Champion lai Bayern Munich chu Atletico Madrid nen group khatah dah an ni a, Real Madrid leh Inter Milan group stage a an intawng nghal tur pawh hian ngaihven a hlawh khawp ang. 

Manchester United-in  Paris St-Germain leh RB Leipzig an awmpui nghal chu an ṭawngṭai chhannaah pawm an harsat ang tih a chiang a, Liverpool tan Ajax leh Atalanta paltlang a awlsam dawn bik lo. Manchester City leh Chelsea erawh an awmna group enin an vannei tih loh rual a ni lo. 

United-in season hmasa finalist PSG an hmachhawn nghal a ngai dawn a, German club ṭhangduang RB Leipzig an la awm tel cheu bawk avangin group H paltlang nghal tura dah chi an ni lo. 

Tun season a Ole Gunnar Solskjaer-a naute khelh dan enin Turkey a Istanbul Basaksehir luhchhuah pawh a harsa ang tih a lang chiang a, United hian European football-ah thlen san an tum chuan transfer bazar lam an hawi nghal a ṭul.

Group D enin Liverpool chu last 16 lut mai tura ngaih an ni a, chutihrual chuan Danish club ṭha FC Midtjylland hi harsa turin lang lo mah se Ajax leh Atalanta hi ngaihthah mai mai atan chuan an ṭha hretin a rinawm. 

Liverpool hian Champions League final a zawna an luh hnuah season hmasa khan last 16 an patlang lo a, Jurgen Klopp-a naute hian tun season-ah thawnthu dang ziah an duh ang. 

Manchester City-in Pep Guar-diola an lakluh chhan lian tak chu European champion nih a ni a, mahse Spanish manager hian he hna hautak hi a la ti hlawhtling thei rih lo. 

Tun season group stage draw aṭanga teh chuan City vanneih ṭum a her chhuak dawn niin a lang a, Porto, Olympiakos leh Marseille paltlang loa tawp mai tur khawp chu City hi an ni lo - football a nih miau avangin chetsual theih erawh a ni. 

Frank Lampard-a nauten Premier League-ah beisei an la phak rih lo a, Champions League-ah tal fan-ten an beiseina an dah sang ang - Sevilla, FK Krasnodar leh Rennes an awmpui dawn a, group E hi an paltlang lo a nih erawh chuan Lampard tan mualphona vawrtawp a ni ang, ti ila sawi uar lutuk kan ni lo ang. 

Group F lama Borussia Dortmund leh Lazio awm ho tur pawh hi en châkawm huangah a khung ngam a, chutihrual chuan kumin Champions League-ah 'group of death' tia sawi tur erawh a awm lo. 

Football khawvela mimal inelna langsar bera chhal ngam chu Messi vs Ronaldo hi a ni a, Champions League group stage a player pahnih intawn hunah chuan football khawvelin khaw dang hawi a harsat ang.

Football khawvela mimal chawimawina hlu bera chhal ngam chu Ballon d'Or a ni a, he chawimawina sem hnuhnung 12 a 11 chu Messi leh Ronaldo ten an insem - Messi hian vawi ruk a dawng a, Ronaldo hian vawi nga a dawn thung. 

Player pahnih an intawn tawhna vawi 35-ah Messi-a khelhna team-in hnehna chang hnem zawkin vawi 16 an chak a, Ronaldo telna team hi vawi 10 an chak ve thung - vawi kua an inhnehtawk. 

Champions League bikah erawh Ronaldo a hlawhtling zawk a, Portuguese forward hian champion nomawi vawi nga a chawi tawh laiin Messi erawh vawi li chiah a la champion thung. 

UEFA chuan Champions League-ah entu an awm theih tur thu an sawi a, mahse an khelhna hmun ram dan a zir zela kalpui tur a ni thung - England-ah inkhel entu awm a la rem loh chuan Premier League club-ten fans an nei thei dawn lo tihna a ni. 

Ruahman dan chuan entu awm an phalna ramah chuan stadium a leng zat aṭanga 30% in inkhel an en a rem dawn a, hetihrual hian social distancing leh mipui himna tur thil pawimawh zawng zawng chu tih a ni ang. 

UEFA Super Cup a Bayern Munich leh Sevilla inkhelah khan UEFA chuan fans 15,000 awm phal chungin he dan hi a lo kalpui chhin tawh a, an hlawhtling thawkhatah an inngai. 

European football thuneitu sang ber UEFA  president Aleksander Ceferin chuan, "Fan-te himna leh ram tina an dan kalpui te zah tak chungin awmze nei takin hma kan la dawn a ni," a ti. 

Group A: Bayern Munich, Atletico Madrid, Salzburg, Lokomotiv Moscow

Group B: Real Madrid, Shakhtar Donetsk, Inter Milan, Borussia Monchengladbach

Group C: Porto, Manchester City, Olympiakos, Marseille

Group D: Liverpool, Ajax, Atalanta, Midtjylland

Group E: Sevilla, Chelsea, FK Krasnodar, Rennes

Group F: Zenit St Petersburg, Borussia Dortmund, Lazio, Club Brugge 

Group G: Juventus, Barcelona, Dynamo Kiev, Ferencvaros

Group H: Paris St-Germain, Manchester United, RB Leipzig, Istanbul Basaksehir