GIG Motors I Day Football Final : Tlai dar 2:00-ah Aizawl FC Vs Chhinga Veng FC

GIG Motors I Day Football final chu vawiin tlai dar 2:00 hian RG Stadium-ah Aizawl FC leh Chhinga Veng FC ten an khel dawn. I League club Aizawl FC hi nikum finalist an ni a, Chhingcows hi I Day Football nomawi vawi thum chawi tawh coach Lalsangzuala Hmar hoin an khel thung.

Coach Victor Lalbiakmawia kaihhruai AFC-in tun inelnaah an khingpui an la hneh vek a, match lia vawi li chak thei awmchhun an ni. Chhingcows erawh match hnuhnung pahnihah an khingpui nen hun pangngaiah an inhnehtawk ve ve a, I League club aiin final kalkawng a harsa hret.

A hmuhnawm dawn

Aizawl FC-in semifinal-ah captain Hmangaihkima, Lalramsanga leh C. Lalmuanpuia te midfield-ah an chhawr a, final-ah rawlthar duhawm Muanpuia aiah K. Lalrinfela (Mafela) a rawn luh zawk a rinawm.

I League club midfield hi an ṭha a, an ṭhatna belhchhah turin tlarhmaah midfield thlawp thiam Lalrinzuala an nei. Mual sirah winger ball bawh na R. Lalthanmawia (Amawia) leh inkhel kalhmang hria R. Ramdinthara (Tharpuia) te an awm.

Player thlir mai chuan Aizawl FC hi midfield-a chungnung zawk tur an ni. Mahse, Chhinga Veng hian tun inelnaah attacking midfielder Lalnunzira chu defensive hna an chelhtir a, Zirtea hian no. 6 hna a tlin. A kawppui Johny Lalremruata hi Mizoram tana khel tawh a ni a, no. 8 hna a thawh ṭhat bakah tun inelnaah goal a khung tel.

Zirtea leh Johny te hi capain MS Dawngliana'n a thlawp ṭha a, Aizawl FC-in kumin January-a an chhuahtir Dawngtea hi Chhinga Veng innghahna a ni. Mual sirah K. Lalruatdika leh Isaak Malsawmkima te an awm a, tlarhmaah Suanngaihmuana a awm. Chhinga Venga player-te hi an lian lo a, an che rang. Coach Sanga hote an nih avangin an khelh dan tur an chiang a, Aizawl FC player-te aiin sulhnu nei ṭha lo zawk mah se I League club khing pha thei tur an ni.

Top Scorer tur?

Final en tichâkawmtu pakhat leh chu top scorer tur a la chiang lo. Chhingcows captain Dawngtea'n goal nga a nei a, goal khung tam ber a ni mek. Bawngkawn tlangval hian penalty a pet bawk avangin top scorer ni turin a dinhmun a ṭha.

Aizawl FC striker Rinzuala'n goal li a khung tawh a, Dawngtea tluk pha turin goal khung a la mamawh. Serchhip tlangval hian Chhinga Veng aṭangin Aizawl FC a pan a, tun hi a club hlui a hmachhawn hmasak ber tur a ni.

AFC freekick specialist Amawia pawhin goal thum a khung tawh a, Lamzawl tlangval hian group match hnuhnung berah hattrick a siam. Final-ah Amawia hian hattrick a siam nawn a nih chuan top scorer a ni daih thei bawk.

Tlarhnung hi...

Chhinga Veng tlarhnung a phui lo a, goal kua zet an chhuah. Chutihrualin knockout stage chinah chuan coach Sanga'n tlarhnung a siam ṭha tawh hle. Chanmari an hmachhawn ṭumin minute 90 chhungin goal an chhuah lo a, extra time-ah pawh injury time-ah goal an chhuah.

Mahse, goal bawh na Aizawl FC an hmachhawn dawn a, goalkeeper RS Lallawmzuala leh defence laia Abel Lalruatfela leh FC Lalhmunmawia te an pawimawh ang. I League club erawh ṭum hnih an clean sheet tawh a, chutihrualin Chanmari FC lakah goal thum ngawt an chhuah tih erawh hriat a ṭha.

AFC hian goalkeeper-ah CYMA Football best goalkeeper Joel Lalramchhana la lut mah se an keeper neih sa Lalhriatpuia an ring zawk. Chhinga Veng laka hnehna chang turin keeper hmaa ding Lalmuanawma (Munez) leh Rohmingthanga ten an hna an thawh ṭhat a ṭul dawn a ni.

"Plan A leh Plan B nei turin kan squad a chhah ve lo. Kan neihsate fuih phur hi kan tih theih tawk chu a ni. Aizawl FC hmachhawn apianga goal venhim tum hi player-te pawh hian an ning ve ṭhin. Relegation pawh a awm hleinem, ngam deuhin, huaisen deuhin kan khel ang."
- Lalsangzuala Hmar, Chhinga Veng coach

"Nikum final-ah kan chesual tawh a, kuminah chuan nomawi chawi ngei a ngai tawh. Player-te pawhin champion an châk a, final khel turin kan inpeih."
- Victor Lalbiakmawia, Aizawl FC coach