Chhun dar 12:00-ah HBC Vs PUC

I Day Hmeichhe Football final-ah Mizorama college ṭha pahnih Hrangbana College leh Pachhunga University College te an inkhel dawn. Nomawi inchuhna hi vawiin chhun dar 12:00 hian Lammualah neih a ni ang.

Inelna hi Food Civil Supplies and Consumer Affairs sponsor a ni a, hmeichhe team paruk an tel. Team parukte hi vawi khat ṭheuh an inkhelh kual hnuah a sang pahnihin final an khel dawn.

Hrangbana College hian group match-ah PUC nen an inhnehtawk tih loh chu an khingpui an hneh vek a, goal 19 zet khungin goal thum chauh an chhuah. PUC pawhin hneh loh an nei bik lo a, goal thum tho chhuahin goal 16 an khung thung.