Neymar-a'n Saudi a pan dawn?

Paris St-Germain chuan Neymar chungchangah Saudi Pro League club Al Hilal nen an inrem. Brazil forward man zat tur hi euro maktaduai 90 (£77.6m) vel a ni ang a, a chet ṭhat dan a zirin a la pung leh thei ang.

Neymar hian tun kar hian Saudi a pan rin a ni a, Al Hilal hian kum hnih contract an zawrh bakah jersey no. 10 an haktir dawn bawk. Tun kartawp Ligue 1 inkhelah Neymar hi telh a ni lo a, tun season atana coach Luis Enrique hmachhawp-ah a tel loh bawk avangin Paris club hi a chhuahsan ngei a rinawm.

PSG hian kum 2017 khan Neymar hi euro maktaduai 222-in an la lut a, tun thlenga player man to ber niin kum khatah euro maktaduai 25 (£21.6m) a hlawha ngaih a ni.

Amaherawhchu PSG hian kalphung an thlak a, player man to leh hlawh tam uchuak kawl loa team din an tum. Chutihrualin Kylian Mbappe erawh PSG-ah a cham dawn a, club thuneituten France forward hi a thlawna a chhuah hlauh avangin contract pawhsei dan an ngaihtuah thung.

Mbappe pawh hi thla liam ta khan PSG-in Saudi lama chhuahtir an tum a, Al Hilal hian pound maktaduai 259-in an lei ngam. France captain hian Saudi pan a duh tak loh avangin transfer erawh a hlawhtling ta lo.

Neymar erawhin Saudi lam a pan ngei rin a ni a, Al Hilal hi a zawm a nih chuan Saudi Pro League hlutna a belhchhah sawt ang. Kumin January thlaa Portugal superstar Cristiano Ronaldo-a'n Al Nassr a zawm hnuah player langsar ṭhahnem takin Saudi an pan.

Karim Benzema, N'Golo Kante, Jordan Henderson, Ruben Neves, Fabinho, Sadio Mane leh Roberto Firmino te chu kumin nipuia Saudi pan player langsar zual an ni. Saudi Arabia club-ten tun ang renga sum an seng huai a nih chuan player langsar dang pawhin an la pan zel ang.