Chelsea leh Liverpool an intiat - siamṭhat ngai a awm ve ve!

Club lian leh langsar, transfer bazar-a na taka inbei, season hmasa an mangchhia aṭanga ṭhangharh tum ve ve, Chelsea leh Liverpool an intawng ta ngei a, chak zawk awm loin an inṭhen.

Stamford Bridge khelmualah Liverpool-in goal an khung hmasa zawk a, Luis Diaz chuan minute 18-na lekah Mohamed Salah siamsak aṭangin a khung - Reds inkhel a hmuhnawm a, chak mai tura ngaihna a lian hman.

Mahse, Chelsea tana a match hmasa berah Axel Disasi chuan goal khungin, London club tan si phurh a sut a, Blues-in an manager thar Mauricio Pochettino enkawlna hnuaia an match hmasa berah point khat an hmu.

Liverpool tan Salah goal khung chu offside vangin pawm a ni lo a, Chelsea tana Ben Chilwell goal khung chu offside vang thoin pawm a ni lo bawk - a tawpah chuan draw result hi 'a fair tawk' tiin a sawi theih.

Liverpool thar

Nipui transfer-ah Liverpool-in player an chân nasa a, a bik takin captain Jordan Henderson leh Fabinho an chân chu an inbuatsaih lawk bik lohna lam a ni - Liverpool an indinthar tiin a sawi theih a, duhthusam squad a ni lo thung.

Reds tan Alexis Mac Allister leh Dominik Szoboszlai ten inkhel bul an ṭan ve ve a, mahse, Hendo leh Fabinho hmun ruak luah tur an la lei loh miau avangin Liverpool an la kim lo. Midfield-ah Cody Gakpo a khel a, Liverpool an la inphuahchawp.

Mahse, Stamford Bridge-a inkhel ṭantir lamah Reds-in inkhel an thunun zawk a, an che vel chu mit titlai a tling. Season dang ang thoin Mohamed Salah a la hriam reng a, Chelsea tlarhnung lamin Egyptian forward hi hmun awl an pe leh ṭhin.

Salah hian goal hmasa ber luh hmain goal khungna remchang a nei a, bar a pet per dawp - minute 18-naah player thiam bik a nihzia pholangin Luis Diaz tan mawi zetin a pe a, Colombian forward hian hmahruaina goal ni turin a khung.

A rei lo

Liverpool-in goal an khung hnuah pawh Chelsea an insiamṭha lo a, Reds hian inkhel an thunun zui. Salah chuan Liverpool tan a khung belhah a inngai a, mahse, video assistant referee a inrawlh.

Salah a offside tih a lang a, Stamford Bridge lawm nan goal-ah pawm a ni lo. Chelsea ben harhin an awm a, an tlarhnung pherh lutuk a ziaawm chho a, mahni muala bet zawk hian an nawr ve thei ta bawk.

Minute 37-na a ni a, Liverpool an nui reng bik lo. Reds tlarhnungten set piece aṭanga ball kal an petchhuah theih loh chu Axel Disasi chuan goal-ah a chantir a, Chelsea tana a match hmasa berah goal a khung nghal.

Liverpool an insiamṭha hman lo - Chelsea hian si phurh sutna goal an khung hnu lawkah Chilwell hmangin goal an khung leh a, 2-1 a ni der. Mahse, VAR a inrawlh a, Chilwell-a goal khung dan ennawn a nih hnuah a offside vangin pawm a ni lo a, 2-1 kha thaichhiain 1-1 bawk a ni.

A neitu Chelsea

Liverpool-in inkhel ṭantir lam thunun mah se chawlhlawk nghakhlel zawkah an ṭang a, an game a fuh thei lo. Mahse, second half-ah pawh Chelsea-in inkhel an thunun zui a, an khelmuala inkhel an ni, tih an inhre ṭan!

A tira team hlauhawm zawk Liverpool an talbuai a, si ban nghaka Alisson ber kher an nei hi Reds fan-te tan chuan lawma zuanna tham a la ni reng - Brazilian keeper hi a khel ṭha takzet.

Blues tan khel ṭha êm êm mai Ben Chilwell leh player thar Nicolas Jackson ten chance an nei ve ve a, mahse, Alisson an paltlang thei lo. Brazil international hian a hna a tlinin, a huaisen ṭhin hle.

Liverpool tan Salah leh Darwin Nunez ten chance duhawm an nei ve tho a, an chhawr thei bik lo. A tawpah chuan 1-1 in an ṭin a, team pahnih tan lawm taka point khat pawm mai hi a fuh ve ve ang.

Team pahnih mamawh Caicedo

Chelsea-in rei tak Moises Caicedo an dawr a, an inrem theih loh chhan hi Brighton & Hove Albion lamin £100mtd tal an beisei vang a ni a, Blues hian £80mtd-a lei dan hram an ngaihtuah thung.

Hetihlai hian Liverpool an lo lang thut a, £111mtd-a an dawrna chu Brighton-in an pawmsak. Caicedo hi Reds lamah a kal mai dawn emaw tih laiin, Ecuador international hian mimal thila inremna a lo neihpui tawh Chelsea lo chu zawm a duh lo.

Mahse, Liverpool an lo lan avangin Chelsea tan £100mtd-a an lei ngam loh kha Reds ngamna aia sanga an dawr a ṭul a, thuthar berah chuan Chelsea leh Brighton hi £115mtd-in an inrem a, Caicedo hian Stamford Bridge a pan dawn.

Chelsea leh Liverpool inkhela lang chu team pahnihin Caicedo an mamawh tih a ni - Reds manager Jurgen Klopp-a'n midfielder pathum rawn remin, tlarhnung ven lama tuimi pakhatmah a nei lo!

Pre-season a defensive-a khelhtir chhin Alexis Mac Allister hi player thiam tak ni mah se number 6 ni turin tharum a ngah tawk lo a, tin a finna, ball thiamna leh a pass ṭha takte hi tlarhma lam puih nan a itawm zawk.

Liverpool hian Roméo Lavia an rim tho a, hei pawh Chelsea-in an rim tho - khawthlang media ṭhenkhat chuan Anfield a pan dawn niin an sawi. Reds hian Lavia la lo pawh ni se defensive midfield hi chu an lei ngei a rinawm.

Chelsea lakah lakchhuah a nih avangin Mo Salah a lawm lo bawk. Mahse, Klopp chuan, "Goal khung se, opening game record a siam dawn a, a lungawi lo kha ka hrethiam. Mahse, kei chuan chu lam ka ngaihtuah lo. Game a hautak avangin player thar luhtir a ṭul a, chu chu ka sawi theih chu a ni mai. Mo a thinrim kha ka hrethiam êm êm a ni," a ti.

Blues-in Enzo Fernandez nei reng mah se manager Mauricio Pochettino hnuaiah Argentina international hian attack lam a pui tam zawk dawn niin a lang a, hei hi Liverpool nena an inkhelah pawh hmuh turin a awm.

Liverpool lakah Enzo chhuak hma deuhin, Conor Gallagher-a'n tlarhnung a pui a, a ṭha tawk lo. Hei vang hian Blues-in Enzo tlanchhuah laia tlarhnung lo venghim turin Caicedo an mamawh a, an mamawh chhanna a nih ngei a rinawm.