Hammers-in Ward-Prowse an la lut

West Ham United chuan Southampton aṭangin midfielder James Ward-Prowse chu pound maktaduai 30 velin an la lut. England international hian Hammers-ah kum li daih contract a ziak.

Kum 28 mi Ward-Prowse hian kum riat a nihin Saints a zawm a, senior team tan match 410 a khelh bakah captain hna a chelh. Season liam ta khan Saints hi Premier League aṭangin an relegate a, Ward-Prowse pawhin a club hmangaih chhuahsanin London club a pan.

West Ham hian Arsenal lakah midfielder pawimawh Declan Rice an chân a, chutihrualin Rice hralhna aṭangin pound maktaduai 105 an hmu let thung.

Hammers-in Ward-Prowse hma hian Ajax aṭangin Mexico midfielder Edson Alvarez chu pound maktaduai 35 in an la lut fel tawh a, Manchester United nen Harry Maguire chungchangah inremna an nei tawh bawk. David Moyes-a hote hian Man City aṭangin loan hmangin Cole Palmer hawh theih an inbeisei bawk a ni.