Inkhelh chawlhsan huna inchhir ka duh lo - Kane

Bayern Munich zawmtu England captain Harry Kane chuan inkhelh chawlhsan huna inchhir a duh loh avanga Tottenham Hotspur chhuahsan a nih thu a sawi.

Bavarians hian kum 30 mi Kane hi August 12, Inrinni khan Tottenham Hotspur aṭangin pound maktaduai 86 (€100) in an la lut a, Pathianni tlai khan an tlangzarh.

Kane chuan, "League dang leh hnam ze dang tem loh vanga football chawlhsan huna inchhir ka duh lo. England-ah Premier League khelin ka hun pum ka hmang a, league dang khel tur chuan insiamrem nan hun ka mamawh ka ring," tiin a sawi.

German Super Cup-ah Kane hi Bayern tan a inlan nghal a, amaherawhchu Inrinni zana inkhelah RB Leipzig ngam loin, 3-0 in an tlawm.

Kane chuan, "Spurs mangṭhana hun ka nei lo a, ka player puite erawh 'text' hmangin ka chhuah tur thu ka hrilh. Hun ka neih veleh an bulah kalin pangngai takin ka va thlah ang," tiin a sawi.

English striker hian Spurs tan match 435-ah goal 280 a khung. Tottenham-ah hian kum 2004 aṭang khan awm ṭanin kum 2010-ah professional contract a ziak a, kum 2011 aṭangin senior team-ah a khel ṭan a ni. Kane hian a thutlukna hi a chhungten an thlawp tlat thu a sawi bawk.