Kane tel loin beiseina kan nei - Spurs coach

Tottenham Hotspur manager Ange Postecoglou chuan Harry Kane chhuak mah se beisei an nei tih a sawi a, an player ṭha tak chhuak mah se an insiamrem theih ngei a ring.

Spurs tana goal khung hnem ber Kane chuan Bayern Munich a zawm a, an striker ṭha ber a chhuah aṭanga darkar 24 a liam hmain tun season Premier League-a an match hmasa ber an khel, an mikhualna ramah Brentford nen 2-2 in an inhnehtawk.

Postecoglou-a'n inelna pangngaiah Tottenham a kaihhruai vawi khatna a ni a, defender Cristian Romero leh Emerson Royal ten goal an khung a, a karlakah mual neitu lamin Bryan Mbeumo leh Yoane Wissa te hmangin an khung ve thung.

Kum 57 mi Postecoglou chuan, "Harry Kane hian club tan sulhnu ropui leh ṭha tak a hnutchhiah ngei mai, mahse tunah chuan a tel loa hun kan hman a ngai a, midang tan hun ṭha leh remchang a inherchhuak ve ta tihna a ni mai.

"Ani a chhuah tak avanga lungngai reng tur kan ni bik lo, min ṭantute pawh beiseina nena hma lam hun thlir turin ka duh, kan match hmasa berah pawh khan beiseina nei ngam turin kan khel," tiin a sawi.

Spurs tana goal 280 khungtu Kane a awm loh takah chuan tlarhma laiah Richarlison dah a ni a, Brazil forward hi player ṭha pangngai tak ni mah se mamawh chhanna erawh a la ni lo.

Brentford lakah Spurs lamin ball possession 66% an nei chungin Richarlison-a'n vawi 16 chauh ball a khawih a, goalkeeper chhiar tel loin North London club zinga ball khawih tlem pahnihna a ni.

Spurs player zinga ball tawk tlem ber chu Romero a ni a, Argentine defender hian goal khung mah se hliam vangin minute 14-na lekah thlak a ni, thlak a nih hma hian vawi 10 chu ball a khawih hman.

Postecoglou-a naute hian an match lehpek atan August 19, Inrinni zan dar 10:00 hian Manchester United an mikhual dawn, an tan chuan fiahna hautak hmasa a ni ang.

Brentford pawhin an striker ṭha ber Ivan Toney an chhawr thei bik lo. English striker hi pawisa inthapna lama a inhnamhnawih avangin Football Association chuan nakkum January thla laihawl thleng atan an hrem.

Toney tel loin season hmasa khan Brentford hian match nga an khelh zinga paliah hnehna an chang a, kuminah pawh nikum lam angin Mbeumo leh Wissa te an rintlak leh dawn niin a lang bawk.