Sinner tan Masters 1000 title hmasa ber
Tennis player ṭha, hmabak nei êng tak zinga mi Jannik Sinner chuan a vawi khat nan ATP Masters 1000 title a la ta a, a inkhelh chhunga nomawi a chawi hlut ber a la ni.
Pathianni zan Canadian Open final-ah Sinner hian Alex de Minaur chu 6-4, 6-1 in a hneh, chak tur hian darkar khat leh a chanve chauh hun a hmang.
Italian tlangval Sinner hi kum 21 mi chauh a la ni. Grand Slam dawta inelna ngaihhlut ATP Masters 1000 bikah hian a hmain final vawi hnih a lut tawh, mahse Miami Masters 2021 leh 2023-ah te a chak lo zawkah a ṭang a ni.
Mahse, tunah erawh Sinner-a hun a thleng ve ta; Australian tkangval Minaur-a service hi vawi nga ngawt a chhuhsak a, amah chauh pawh ni loin Italian mite tan sulhnu ṭha a hnutchhiah.
Kum 1990 aṭang khan ATP Masters 1000 hi kalpui ṭan a ni, a hnu lamah Fabio Fognini (Monte-Carlo 2019) chauh chu Italian player zinga hlawhtling thei a ni reng a, tunah chuan Sinner hmel a rawn lang ve leh ta a ni.
World number 6 Sinner chuan, "Ka tan chuan result duhawm leh hriatreng tawh tur a ni a, tuna ka hlawhtlinna hian nomawi dang chawi belh chakin min ti tuihal zual ngei ang tih pawh ka ring.
"Tournament awlsam a ni lo a, ka khingpui apiang mai kha player ṭha tak an ni vek maiin ka hria. Zah tak chung siin ka hmaa ding apiang ka hneh thei kha ka lawm," tiin a khelh dana a lungawi thu a sawi.
Canadian Open-ah hian Alexander Zverev chuan kum 20 mi ni chungin nomawi a lo chawi tawh, kum 2017-a German tlangval champion dawtah chuan Sinner hi champion thei naupang pahnihna a ni hial.
Tennis season kal laiah Grand Slam pathum an khel tawh - Australian Open, French Open leh Wimbledon a zo tawh. August thla tawp lam aṭangin US Open an khel leh ang.
New York khawpuia khelh tur US Open atan inbuatsaihna kalpui mek a ni a, tunkar aṭangin Cincinnati Open an khel leh ang, inelaah hian world number 1 Carlos Alcaraz pawh a inlan dawn.
Spanish star Alcaraz hi Canadian Open khelh zawh takah khan quarterfinal paltlang zo loin a tla. Nomawi a kawl mekna US Open-a che ṭha tur chuan tun Cincinnati lamah hian a chet ṭhat a pawimawh dawn a ni.