Barcelona-in goal an khung lo

Spanish La Liga-ah champion lai Barcelona chu Pathianni zan khan an inlan a, Xavi naute hian season thar atana an match hmasa berah goal an khung thei lo - Getafe nen 0-0 in an inhnehtawk.

Season hmasa lawka Barca treble champion puitu leh an captain ni bawk Ilkay Gundogan chuan Barca tan a match hmasa ber khel mah se Catalan club hi hnehna a chanpui zo lo a, German midfielder tan bul ṭan dan duhawm a ni lo.

Getafe khelmuala inkhelah boruak a 'hot' a, red card pathum phawrh a ni - pahnih chu Barca tan a ni a, pakhat erawh mualneitu Getafe lam chan a ni ve thung!

Barca forward Raphinha leh coach Xavi te chu red card pek ve ve an ni a, Getafe winger Jaime Mata chu a yellow card pahnihna avangin hnawhchhuah a ni ve bawk.

Duhawm lo

Gundogan-a'n treble champion team meuh chhuahsanin Barca a pan a, hei hian football khawvelin Barca an dahsanzia a pholang - Gundogan hian City captain ni chungin Champions League, Premier League leh FA Cup nomawi a chawi zo chauh a, City-in cham tur pawhin an duh.

Mahse, Barca an lo lan avangin tunlai khawvela team ṭha ber ang hiala ngaih City a chhuahsan a, sum lam harsatna avanga team talbuai tak Barca a zawm - a match hmasa ber result erawh Gundogan tan a beisei ang a ni bik kher lo ang.

Gundogan hian first half-ah goal khungna remchang a nei dawn angin lang mah se assistant referee-in a ban a phar a, German midfielder a offside.

Barca tana a match hmasa berah Gundogan hian bul ṭan nghal mah se minute 79-naah lakchhuah a ni a, Germany international hian an match hnihnaah chuan point thum nen ngei khelmual chhuahsan a duh tawh ang.

A 'hot'

Getafe khelmualah Barca hi harsatna nei loa chak mai tura ngaih an ni a, mahse, an beisei ang ngawtin a awlsam lo. Catalan club ṭantuten goal an hmu lo a, red card pahnih erawh chiang takin an hmu thung!

Minute 42-naah forward Raphinha chu hnawhchhuah a ni a, Brazil international hian Getafe defender Gaston Alvarez chu a nghawk lui - Raphinha hian hnawhchhuah a nih hmain goal khungna remchang ṭha tak a nei a, mahse, Getafe goalkeeper David Soria chuan a dansak.

Getafe hian mahni mualah tam zawk an nih an chhawr hman bik lo a, minute 57-naah Jaime Mata chu a yellow card pahnihna a hmuh avangin hnawhchhuah a ni a, Catalan club-in an chhawr chuang lo thung.

Referee-in Barca boss Xavi pawh a zuah bik lo. Spanish coach hi a player Abde Ezzalzouli chunga thil thleng avangin a lungawi lo a, a lantir nasat hret avangin referee-in dressing room lama a team lo nghak mai turin red card a pe.

Barca an vanduai

Catalan club-in 75% zet ball an chang a, vawi 14 ngawt goal-ah shot an nei bawk - heng zinga pali hi target zawnah a kal a, a tawi zawnga sawi chuan Barca-in inkhel an thunun.

Chutihrual chuan Barca vanneih zan a ni lo a, Robert Lewandowski hoin bul ṭan mah se Getafe khelmualah goal an khung theih tlat loh avangin kut ruakin an haw.

Polish striker Lewandowski hian second half-ah a tauh lut ngei dawn niin a lang a, mahse, line aṭangin a ball tauh chu an lo pet chhuak hman a, Barca hi an beisei penalty pek an ni lo bawk.

Catalan club tan Gavi leh Ronald Araujo ten penalty an hlawh chhuak ngei dawn niin a lang hman a, mahse, player pahnih laka foul hi video assistant referee rawn a nih hnuah referee-in penalty pekna khawp tur niah a ngai lo.

Result dang

Pathianni zan La Liga inkhel dangah Real Betis chuan 2-1 in Villarreal an hneh - Betis tan season hmasaa Leicester City aṭanga an hawh, tun transfer-a free-a an lak Ayoze Pérez chuan minute 20-naah goal hmahruai a khung.

Yellow Submarine (Villarreal sawina) hian si phurh sut lawk thei lo mah se, minute 61-naah Jorge Cuenca hmangin an chhanglet a, team pahnih hi an inhnehtawk mai dawn niin a lang hman.

Mahse, Betis-in ngaihdan dang an nei. Hun pek belh minute nganaah Betis tan Willian Jose chuan goal a rawn khung ve leh a, Villarreal tan chhanglet turin hun a awm tawh lo - Betis an chak.

Hetihlai hian Osasuna chuan khualmualah 2-0 in Celta Vigo an hneh a, Ruben Garcia leh Moi Gomez ten goal khat ve ve an khung - nizan khan Atletico Madrid an inlan a, Granada nen inkhelin an result kan hre hman lo.