Canadian Open champion Pegula

Jessica Pegula chuan Liudmila Samsonova chu 6-1, 6-0 a hnehin Candian Open champion a ni a, tennis a khelh hun chhunga nomawi pathum a chawina niin WTA 1000 trophy pahnihna a ni nghal bawk.

Grand Slam dawta inelna ngaihhlut a nih avangin Canadian Open hian ngaihven a hlawh ṭhin. American player zingah Pegula hi Serena Williams (2013) hnua champion leh thei hmasa ber a ni hial.

World number 3 Pegula chuan, "A nihna tak sawi chuan chawlhkar tin mai hian nomawi chawi theih a awm a, mahse mi zawng zawng tan title lak vek theih a ni si lo.

"Kei ngei pawhin ka hun a thlen ve theih nan ka nghak rei ṭhin hle, a chang chuan match tam taka hnehna chang chunga kan champion loh chang a awm, tunah erawh ka vanneih ni a herchhuak," tiin a sawi.

American nula Pegula hian final kalkawngah Yulia Putintseva, Jasmine Paolini leh Coco Gauff te a hneh hnuin, semifinal-ah champion tura rinkai world number 1 Iga Swiatek a hneh leh bawk.

Pegula chuan, "Match zawna Coco leh Iga hneh kha chu a hautak khawp mai, final erawh minute 49 chauh kan khelh avangin a awlsam ta zawk a ni," tiin a sawi.

Chak lo zawk Samsonova khan final lut turin tennis court-ah darkar 10 deuhthaw hun a hmang a, a bik takin semifinal-a world number 4 Elena Rybakina nen an inkhel chu ruah sur vangin a khaihlak, a tawpah inkhel zo tho mah se final an khelh meuh chuan a taksa a chau tih a lang.