World championship-ah India player 16

Badminton World Federation (BWF) hnuaia inelna lian Badminton World Championships 2023 khel tur tih fel a ni a, inelna hmachhawn tur zingah India player 16 ngawt an tel.

Badminton hmunpui Kuala Lumpur, Malaysia-ah draw neih niin, Indian player inlan tur zinga pali chu singles huangah a ni ang.

Player tel tur zawng zawng zingah HS Prannoy bakah Satwiksairaj Rankireddy leh Chirag Shetty te ṭangdun chauh seeded sang zual 10 zinga tel phak an ni thung.

PV Sindhu chu seeded 16-na pek a ni a, season a hman chhiat em avangin a ranking pawh a hniam. Indian nula zinga World Championship (2019) gold medal la thei awmchhun hi first round-ah chuan a bye phawt.

A match hmasa ber atan Thuy Linh Nguyen leh Nozomi Okuhara te inkhela chak zawk a hmachhawn ang, a kaltluang a nih chuan a kalkawngah Ratchanok Intanon leh world number 1 An Seyoung te an awm thei dawn.

Mipa singles lamah HS Prannoy, Lakshya Sen leh Kidambi Srikanth te an inlan dawn, an khelh fuh ṭum a nih chuan player pathum hian champion turin theihna an nei, season kal lai an hman dan thlir erawh chuan a awlsam dawn lo.

Tournament hi August 21-27 chhungin Copenhagen-ah khelh a ni dawn a, ram hrang hrang 55 aṭangin player 375 an kalkhawm ang. Men’s singles, women’s singles, men’s doubles, women’s doubles leh mixed doubles hmangin inelna hi neih tur a ni.