Italy coach Mancini a bang

Roberto Mancini chuan kum nga hnuah Italy coach a nihna a bansan, a hmun ruak luah tur hi puan la ni nghal chiah lo mah se ni rei vak lo hnuah an puang dawn niin an sawi.

Italian Football Federation (FIGC) chuan thuchhuah siamin, "Roberto Mancini hnen aṭangin Italian Football Federation chuan Italian national team coach a nihna aṭanga banna lehkha kan dawng.

"Kum 2018 May thla aṭangin team enkawl hna a thawk a, he tih chhung hian Euro 2020 champion kan nih bakah Nations League 2023 final kan lut. Azzurri chu mimal ni loin team a innghat a nihzia chiang takin a lantir hman," an ti.

Manchester City manager hlui hian Italy hi match 37 a chak pui a, vawi 15 chu an khingpuite nen inhnehtawkin ṭum kua chu an tlawm thung. Amah thlaktu tur an la puang lo a, nakkum Euro-ah erawh Mancini tel loin Italy an inlan a ngai dawn.

Italy hian 2018 World Cup an khel phak lo a, world champion vawi li ni tawh Azzurri tan mualphona nasa tak a ni, Khawvelin mak tia Italy a thlir laiin Mancini hian an ram team enkawl hna hi a rawn thawk ṭan.

Italian manager hian player naupang rual a ring ngam a, tawnhriat nei a thlauh thla vek chuang lo. Zawimuangin team nghet tak a din a, a zawna match 37 chhung tlawm nei miah loa kaltluan lai pawh an nei hial.

Euro 2020 khan ropui taka inlanin an champion, nomawi an chawi theih nan hian inelna thlengtu England chu an khelmual hmanthiam leh chhuan tak mai Wembley Stadium-ah ngei an hneh.

Mahse, mak deuh mai chu 2022 World Cup khel tur khan an tling leh tlat lo! Euro champion lai ni si khan khawvel huap football inelna boruak lian ber hmachhawn turin an tling phak lo tihna a ni.

Italy hian tunah chuan Euro 2024 qualifying an khel mek. March thla khan Gareth Southgate-a enkawl Three Lions an ngam lo, an match khelh leh hmabak hnai ber chu September thlatirah niin North Macedonia nen an inkhel ang.