EPL player lut to ber Caicedo

Chelsea chuan Brighton midfielder Moises Caicedo an lei fel, pound maktaduai 100 zet an pe phawt a, a man zat hi pound maktaduai 115 thlenga pung chho thei tur a ni ang.

Blues hian Enzo Fernandez lei nan kumin January thla khan pound maktaduai 107 an lo hmang tawh. Argentine midfielder hi Premier League player zinga man tam ber a ni ṭhin, tunah chuan Caicedo hian a rawn khum ta chiah.

Kum 21 mi Caicedo hian Liverpool a zawm hman teuh hle, kar hmasa khan Reds leh Brighton chu pound maktaduai 111 zetin an inrem hman. Mahse, Ecuador international hian Chelsea pan a thlang ta zawk.

Caicedo chuan, "Chelsea nen kan inbiak khan ka inngaihtuah nawn lo, zawm turin thutlukna ka siam nghal. Blues tana khelh hi ka duhthusam a ni a, team thar tana khelh hlan ka nghakhlel tawh hle," a ti.

Kum 2021 khan Caicedo hian Brighton a zawn, a man zat chu pound maktaduai li chauh a ni. Hun rei lote chhunga a man zat punna hi a sang ta hle a, tunah chuan Stamford Bridge-ah kum riat atan contract a ziak, season khat atana pawhsei theih tura tih a ni bawk.

Seagulls hian an la duhtawk mai lo, an player hralh tawh hi a neitu thar Chelsea lamin an hralh leh a nih chuan, an hralh dana zirin sum chan theih an la nei dawn cheu bawk - sumdawnna hunah chuan an che ṭha viauin a lang.

Caicedo chuan, "Ka hringnuna zinkawng pawimawh leh hriatreng tawh tur chu ka tawng. Europe khawmualpuia ka inkhelh aṭangin thlawpna leh duhsakna ka dawng ṭha êm êm a, a bik takin Brighton chungah ka lawm," tiin a sawi.

American sumdawng hausa Todd Boehly-a'n Chelsea a neih chinah player lei nan sum a hmang nasa. Caicedo hi player a lakluh 22-na a ni der tawh a, nikum May thla aṭang ringawt khan player lei nan pound maktaduai 900 an hmang tawh.

Tun nipui bazar chhungin Axel Disasi, Christopher Nkunku, Nicolas Jackson, Lesley Ugochukwu, Angelo Gabriel, Robert Sanchez leh Diego Moreira te an la lut tawh a, caoch thar Mauricio Pochettino an nei bawk.

An neih sa aṭangin Mateo Kovacic, Edouard Mendy, Kalidou Koulibaly, N'Golo Kante, Mason Mount, Kai Havertz, Christian Pulisic, Ruben Loftus-Cheek, Ethan Ampadu, Pierre Emerick-Aubameyang, Abdul Rahman Baba leh Cesar Azpilicueta te an chhuak thung.