Wolves lakah Man United an vannei

Manchester United chuan Premier League match hmasa berah inelna ṭan hma lawka manager thlak Wolverhampton Wanderers an hmachhawn chungin 1-0 chauhin an chak.

Thawhṭanni zana Old Trafford-a inkhelah hian goal awmchhun hi Raphael Varane-a'n minute 14 chauh a awm tawh tihin a tauh goal. Wolves hian penalty shout an neih bakah Matheus Cunha-a'n goal ruaka sawi theihah a khung lo. Erik Ten Hag-a hote an vannei hle.

A ṭha 11

Man United hian striker thar Rasmus Hojlund inhliam la inkhel thei lo mah se an player neih ṭhat dang an chhawr thei a, goalkeeper thar Andre Onana leh midfielder thar Mason Mount ten bul an ṭan.

Friendly match-a RC Lens an hneh ṭum aṭangin player pakhat chauh an thlak a, Diogo Dalot aiah Aron Wan-Bissaka a lut. Tlarhmaah Marcus Rashford a awm a, English forward hi Antony leh rawlthar duhawm Alejandro Garnacho ten an thlawp.

United hian a ṭha 11 an luhtir chungin beisei an pha lo. Rashford-a'n a chance ṭha neih ṭum hnih a hlah a, no. 9 a awm nghet turin a rintlak loh. Antony leh Garnacho te mamawh chhanna an ni pha lo.

Minute 76-naah erawh captain thar Bruno Fernandes-a'n a class sanzia pholangin box chhungah ball fing a pet lut a, ball umtu Wan Bissaka-a'n vawrh chho lehin Varane-a'n a tauh goal. Goal khungtu tluk zetin goal khungna tura siamsaktu pahnih an pawimawh.

Vanneihna

Wolves-in Gary O'Neil hnuaiah training nei tam hman lo mah se awmze neiin pressure an pe a, tlarhnung aṭangin United player-te awlsam taka pass chhuahtir an rem ti lo.

United tlarhma an cheh ral bakah player thar Mount pawh hun thawl an pek loh avangin United tana a khelh hmasak berah beisei a pha lo hle.

Chutihrualin Wolves tlarhma an hriam bik lo. Pablo Sarabia ball pek chu Matheus Cunha tan harsa niin lang tawh lo mah se Brazilian forward Cunha hian goal ban pet per nan a hmang.

Substitute Fabio Silva pawhin chance ṭum hnih a nei a, Andre Onana-a'n a dansak ve ve. Hun tawp hma hretin Onana-a'n substitute Sasa Kalajdzic a sut avangin Wolves-in penalty an beisei a, VAR hmanga thil thlen dan en a nih hnuah United duh danin thutlukna a kal ta zawk.

Lawm leh lawm lo

Manchester United manager Erik ten Hag chuan, "Tun aia khel ṭha zawk thei kha kan ni. Pre-season leh season liam taa kan khelh dan en pawhin kha ai khan kan la ṭha zawk tih ka chiang, mah se match hmasa ber chu a harsa ṭhin. Goal kan chhuah lo a, point thum kan hlawh chhuak a, ka nauten an tihtur an ti e," tiin inkhelh banah a sawi.

Point thum vangin Man United an lawm a, club ṭantute erawhin club neitu thar an duh. 'Glazers Out' tih chu fan-te au hla a ni a, Mason Greenwood let tura duh lo pawl an awm bawk.

Greenwood hian dan anga thiam a chang vek tawh chungin United hmeichhe team lamin let lo turin an duh a, English forward hmalam hun hi a la chiang lo.

Wolves manager Gary O'Neil pawh lawm lo zinga mi a ni a, penalty pek an nih loh avangin a thinur. O'Neil chuan, "Referee hotu Jon Moss pawhin penalty pek kan ni lo chu mak a ti a, ngaihdam min dil," tiin inkhelh banah a sawi bawk.