UEFA Super Cup Man City hmaa ding tur Sevilla
UEFA Super Cup chu zanin dar 12:30 hian Karaiskakis Stadium, Greece-ah khelh a ni dawn a, Champions League champion Manchester City leh Europa League champion Sevilla te an inkhel ang.
Pep Guardiola kaihhruai City hi European champion an ni satliah lo a, season liam ta khan Premier League leh FA Cup-ah an champion bawk. Tun dinhmuna Europe-a team ṭha bera ngaih a ni a, Sevilla lakah rinkai zawk an ni ang.
UEFA Super Cup hi Sony Ten 2-ah a en theih ang a, online hmanga en duh tan SonyLiv hmangin a en theih bawk ang.
Nomawi duh City
Man City hian Community Shield-ah Arsenal an hneh loh avangin UEFA Super Cup hi tun season-a an nomawi chawi theih hmasak ber a ni dawn. Pep-a hote hian Gunners an hneh loh avangin Super Cup nomawi chawi duhin an tuihal sawt ang.
Season liam taa UCL an champion-na tura player pawimawh Ilkay Gundogan a awm tawh lo a, Croatian duo Mateo Kovacic leh Josko Gvardiol te an la lut thung.
Kovacic hian Community Shield-ah bul ṭan mah se Premier League match hmasa bera Burnley an hneh ṭumin bench aṭangin a lut. Pep-a'n Kovacic leh Gvardiol te bul a ṭantir a nih pawhin a mak lo ang.
Hliam vangin John Stones, Ruben Dias leh Kevin de Bruyne te an khel thei dawn lo a, City ṭha ber inlan thei dawn lo mah se Super Cup khel turin an squad a ṭha tawk.
Erling Haaland-a'n goal a khung chhunzawm zel a, Norwegian striker ringawt pawh hi uanpui tham a ni. Manager Pep Guardiola erawhin a record ṭha tak hi belhchhah zel a duh.
Spanish manager Pep hian kum 2016 khan City hi a zawm a, match 267 enkawl tawhin vawi 198 a chakpui. City hian attacking football khelin goal 662 zet an khung tawh a, Premier League nomawi vawi nga chawi tawhin season liam ta khan an la chawi loh UCL-ah an champion. Kuminah Super Cup leh FIFA Club World Cup champion theihna kawng a inhawng leh chiah bawk.
Rin thiam har Sevilla
Sevilla hi Spanish club ṭha zinga mi an ni a, Europa League aṭanga teh erawh chuan Europe club ṭha ber an ni thung. Spanish club hian Europa League champion theihna thuruk an hria a, kum 2005 hnuah vawi ruk ngawt an champion tawh.
Amaherawhchu Super Cup-a hnehna chan erawh an harsat thung. Sevilla hian Super Cup an khelh hmasak berah Barcelona hneh thei mah se hemi hnu match nga an khelhah an chak lo vek. An hneh loh club-te chu Real Madrid (2), AC Milan, Barcelona leh Bayern Munich te an ni.
Season liam ta pawh khan Sevilla hi an che ṭha lo a, Europa League an champion tho. Kuminah pawh Sevilla hian Valencia hneh loin season bul an ṭan. Kartawp inkhelah player thar Loïc Badé hnawhchhuah ni mah se Super Cup-ah erawh French defender hi a khel thei dawn.
Sevilla hian goalkeeper ṭha Yassine Bounou an nei a, tlarhmaah Youssef En-Nesyri a awm bakah tawnhriat nei ṭha Jesús Navas leh Ivan Rakitic ten an ho theih avangin rinkai lo zawk ni mah se Man City tan chetsual theihna an ni ang.