Chenna ngai loh ram fangtu Spain

FIFA Women's World Cup final-ah Spain-in mang ram an chen zel - nimin khan semifinal-ah Sweden chu 2-1 in an hneh a, World Cup last 16 aia sang la thleng ngai lo khan kum 2023 a herchhuah meuh chuan final an lut ta!

Eden Park, Auckland-a fans 40,000 chuang pungkhawm hmaah team pahnihin goal an khung lawk thei lo a, extra time khelh a ngai ngei dawn niin a lang hman.

Mahse, minute 81-naah Spain tan bench aṭanga luhtir Salma Paralluelo a inlar a, kum 19 mi tleirawl duhawm hian goal hmahruai a rawn khung - hun tlem tawhzia ngaihtuahin a 'timing' takzet a, Spain an chak ngei dawn niin a lang.

Mahse, champion ngun ber USA leh World Cup hnuhnung ber finalist Netherlands pet chhuaktu Sweden an inringtawk a, hun tam tawh lo karah pawh chi ai duh loin, Rebecka Blomqvist chuan minute 88-naah Sweden tan si phurh a sut!

Minute hnih chiah a awm tawh a, fans tam zawkin extra time an mitthla ngei ang. Mahse, a mak asin - Eden Park-a Sweden fan-te hlim authawm pawh a reh hman lo. Spain captain Olga Carmona chuan hun harsaah mawhphurhna lain, minute 89-nah goal a khung ve lehnghal.

Sweden meuh pawh an nguai a, tho leh turin an tan thilmak a thlen tel a ngai tawh a, fan-ten an beisei thilmak an hmu lo - Spain an chak a, a vawi khat nan final an lut. A vawi khat nan nomawi nen haw an tum ngei ang.

Vawiinah semifinal match hnuhnung zawk khelh a ni dawn a, inelna thlengtu pakhat zawk Australia leh mipui ngaihven England chu tlai dar 3:30-ah hian an intawng dawn a ni.