Gerrard-a team-in Al Nassr an hneh

Steven Gerrard enkawl Al Ettifaq chuan Saudi Pro League-a an match hmasa berah Al Nassr an hneh nghal a, 2-1 in hnehna an chang - Ettifaq tan Liverpool captain hlui Jordan Henderson chu captain armband hreng chungin a inlan.

Al Nassr tan hliam vangin Cristiano Ronaldo a inlan thei lo a, hei vang hian tlarhmaah Liverpool forward hlui Sadio Mane chu a mal tlat a, captain a ni bawk - Mane hian minute lina lekah goal hmahruai a khung nghal a, Al Nassr hi awlsam takin an chak mai dawn niin a lang hman.

Mahse, Hendo neitu Ettifaq hian Sweden international Robin Quaison leh Lyon striker hlui Moussa Dembele an nei tel a, player pahnih hian Gerrard-a team chhanhim nan goal khat ve ve an khung.

Aston Villa boss hlui Gerrard tan result lawmawm bik a ni a, Rangers-a pathian ang hiala an en, Villa lamin an ban tak coach tan coaching lama theihna a neihsanzia pholan nan Saudi Pro League a pawimawh zel dawn.

Liverpool-a khel dun ṭhin Hendo leh Mane ten an team tan bul ṭan ve vein an inhmachhawn a, nikum May-ah kha chuan player pahnih hian Champions League final khelin Liverpool tan bul an ṭan - tunah chuan thawnthu a danglam ta.