Real-ah Chelsea keeper Kepa a khel dawn

Chelsea goalkeeper Kepa Arrizabalaga chuan season khat chhung loan-a khel turin Real Madrid a pan a, khawthlang media-ten an tarlan dan chuan Spanish keeper hian a loan hun zawha a ngheta Real a zawm theihna dan ziah tel a ni lo.

Real Madrid hian an keeper chhuanvawr Thibaut Courtois chu khup hliam vangin season chanve chuang an chhawr thei dawn lo a, Ukrainian keeper Andriy Lunin nei tho mah se a chunga rinna pumhlum nghah an harsat.

Hei vang hian Blues lam hawiin Kepa an la lut a, Belgian keeper Courtois awm loh chhungin Real tan number 1 a ni tura ngaih a ni - Spanish keeper hi Bayern Munich nen pawh sawi zawm a ni tho a, German champion hian an keeper Manuel Neuer inhliam vang thoin lakluh an duh.

Mahse, Spanish keeper Kepa-a'n an ram lama kir a, Spanish team langsar ber pawl tana khelh a châk a, season khat chhung loan-a khel turin a kir leh ta.

Blues hian Brighton & Hove Albion aṭangin keeper Robert Sanchez chu pound maktaduai 25-in an la lut a, Liverpool nena an match hmasa berah pawh Sanchez hian bul a ṭan.

Hei vang hian Kepa tan Real pan pawh hi thil awm lo a ni hran lo a, season khat lek khelh pawh Spanish player tan chuan a hlu dawn tih a chiang sa.

Chelsea hian an keeper Edouard Mendy chu Saudi Pro League club Al Ahli lakah an lo chân tawh a, Kepa a chhuah leh tak bawk si avangin kum 31 mi goalkeeper Marcus Bettinelli chu squad-a senior keeper an neih awmchhun a ni ta a, kum 20 mi Lucas Bergstrom leh kum 19 mi Eddie Beach an nei bawk.

Real hian season thar atana an match hmasa berah Kepa club hlui Athletic Bilbao hmachhawnin, 2-0 in hnehna an chang. Coach Carlo Ancelotti hoin champion leh ngei an tum ang.