Atletico Madrid an chak nghal

La Liga season thara an match hmasa berah Atletico Madrid chuan hnehna an chang nghal a, Thawhṭanni zan khan an mikhual Granada chu 3-1 in an hneh.

Tun hnaia chhuak tur anga sawi, mahse, coach Diego Simeone-a'n an mamawh thu a sawi Álvaro Morata chuan Argentine coach lung a dum chhan pholangin, first half hun pek belhah hmahruaina goal a khung.

Atletico-in goal dang an khung lawk loh avangin Granada tan Samuel Omorodion chuan si phurh a sut a, mahse, mikhual team-in beiseina an neih chhung erawh a rei lo hle.

Morata thlaktu Memphis Depay chuan goal an chhuah aṭanga minute ngana lekah hmahruaina goal a khung ve leh a, Marcos Llorente chuan hun pek belh minute riatnaah chak nemnghehna goal a khung bawk.

Atletico tan Antoine Griezmann leh Yannick Carrasco pawhin bul ṭanin, Granda tlarhnung tan hnawksak an tling a, mahse, a pawimawh ber goal erawh an ken tel zan a ni lo.

Hetihlai hian chhuak tur anga sawi thawm awm reng Joao Felix chu bench lamah ṭhut tluantir a ni a, Portuguese forward hi stadium chhung screen liana a hmel tihlan a nih apiangin fan-ten an lo au el.

Felix hian tun hnaiah Barcelona tana khelh chu a duhthusam a nih thu a sawi a, Madrid khaw club ṭantute hian an player-in an hmelma club tana khelh a châk thu a sawi hi an hrethiam lo a ni.

Atletico tan hian Chelsea captain hlui Cesar Azpilicueta chuan inkhel bul ṭanin, Leicester City-a contract a hman zawh avanga an lakluh Caglar Soyuncu chu bench aṭanga luhtir a ni bawk.

Tun season La Liga-a an match hmasa berah Real Madrid leh Atletico Madrid ten hnehna an chang nghal a, Barcelona erawh an chak zawh loh avangin season ṭantir aṭangin champion lai hian pressure an nei nghal.

Thawhṭanni zan inkhel dangah Cadiz chuan 1-0 in Alaves an hneh a, Fede San Emeterio chuan inkhela goal awmchhun a khung - Cadiz defensive midfielder Gonzalo Escalante chu hnawhchhuah ni mah se, red card pek a nihin minute 88-na a ni tawh a, Alaves tan awmzia a nei phak lo.