Atalanta-ah a hneh zo ta - a hming Jota'n!

Diogo Jota chuan Champions League-ah hattrick a siam a, Liverpool chu Atalanta lakah 5-0 in hnehna a chanpui.

Reds tan Mohamed Salah leh Sadio Mane-te chuan goal khat ve ve an khung bawk a, Europe-a an match hnuhnung 19-a goal 40 khungtu Atalanta-in a chhanletna tur an nei lo. 

Goal khung uar Atalanta-in Liverpool an mikhual meuh chuan goal chhuah uarah an ṭang ta zawk a, Reds-in Champions League match thum an khelhah hnehna an chang vek ta bawk. 

Group D inkhel dangah Ajax chuan 2-1 in FC Midtjylland an hneh a, Dusan Tadic leh Antony-ten Ajax tan minute 13 chhunga goal hnih an khung avangin Danish club tana Anders Dreyer-a goal khungin awmzia a nei lo. 

Liverpool boss Jurgen Klopp-a'n Atalanta mualah tun hnaia khel ṭha tak Jota chungah rinna a nghat a, Salah leh Mane nena inkawp ṭhin Roberto Firmino chu bench lamah hun hmantir a ni. 

Jota'n minute 16-na lekah a pu rinna a tihlawhtling nghal a, Trent Alexander-Arnold hnen aṭanga a ball hmuh chu defender Jose Luis Palomino a tlan pelh hnuin Atalanta goalkeeper Marco Sportiello tana dan ngaihna awm loin a pet lut.

Pound maktaduai 41 man forward hian a man a phu tih pholangin minute 33-naah Joe Gomez-a ball pek chu rang taka la thla chungin goal-ah a chantir a, minute 54-naah hattrick a siam zui. 

Jota hattrick siam hmain Salah leh Mane-ten goal khat ve ve an khung bawk a, Italy-ah chiang takin Reds-in hnehna an chang - last 16 lut chiang turin match khat chak bak an mamawh ta lo. 

October-ah khan Reds hian zuai lam an pan dawn niin a lang hman a, Arsenal-in Carabao Cup aṭanga penalty hmanga an petchhuah hnuah Aston Villa chu league-ah 7-2 in an ngam lo a, Everton nen 2-2 in an inhnehtawk bawk. 

Virgil van Dijk, Fabinho leh Thiago Alcantara-te hliam vangin an chhawr thei lo zui. Mahse, Reds hi insiamṭhain an match hnuhnung pangaah hnehna an chang vek a, an hmaa inchhawp chu Manchester City an ni - Pathianni zan dar 10:00-ah Eithad Stadium an leng ang. 

Klopp-a rilru tibuaitu tur chu Firmino nge Jota bul a ṭantir dawn, tih hi a nih hmel - Jota hian Reds tan match 10-ah goal sarih a khung ta a, Firmino erawhin match 11-ah goal khat chiah a la khung. Mahse, Klopp chuan, "Atalanta khelh dan ka hria a, chuvanga Jota khelhtir ka ni. 

"Mi pakhat a khelh ṭhat avanga kan tana game 500 deuhthaw khel tawh hming sawi a ngai hi a buaithlak lai chu a ni - Firmino nei lo ila, Champions League pawh kan khel lo ang. Bobby khelh dan avanga he team hi 'special' kan ni tih hi mi tam tak ngaihdan a ni a, lu haina tur a awm lo," a ti a, Firmino chungah rinna a nghah chhunzawm dawn tho niin a lang.