Zanin dar 7:30-ah IPL Qualifier 1 Mumbai Indians vs Delhi Capitals

Indian Premier League qualifier 1 chu zanin dar 7:30 hian Mumbai Indians leh Delhi Capitals ten Dubai International Stadium-ah an khel dawn. Zanina chak zawk hian final an lut nghal dawn a, a chak lo zawkin eliminator-a Royal Challengers Bangalore leh Sunrisers Hyderabad te inkhela chak zawk an hmachhawn ve leh ang.

Mumbai Indians hian kumin IPL-ah Delhi hi vawi hnih an hneh tawh a, qualifier 1-ah erawh an chakna hian ham ṭhatna a keng tel lo thung. Team pahnih hian bowler ṭha an kawl ve ve a, Mumbai lamin India chhuanvawr Jasprit Bumrah an nei a, Delhi lamin South Africa star Kagiso Rabada an kawl ve bawk.

Indians hian league match hnuhnung berah Hyderabad Sunrisers an hneh lo a, wicket pawh an la lo. Amaherawhchu Bumrah a tel lo tih hriat a ṭha - Indian bowler hian match 13 aṭangin wicket 23 a lak bakah run a pe tlem bawk. 

Delhi bowler Kagiso Rabada hi Bumrah aia tun inelnaa record nei ṭha awmchhun a ni a, match 14 aṭangin wicket 25 a la. Batsman lamah Delhi hian Shikhar Dhawan leh Shreyas Iyer te an kawl a, Mumbai lamin captain Rohit Sharma leh Quiton de Kock bakah danglamna thlen thei Kieron Pollard te an nei thung. Chak zawk tur hriatthiam a har a, Mumbai hi rinkai hret an nih rualin ṭhumvawra a vanneih a pawimawh tel ang.