Saudi lamah Neymar a pem ve leh ta!

Tute emaw 'bill' la hlim ang mai an ni - Saudi Arabia-in football khawvelah sum an theh chhuak zel a, chin tawk an nei lo! Thawhlehni zan khan football khawvela player langsar ber pawl Neymar chuan Saudi Arabia a pan ve leh ta.

Paris St-Germain forward Neymar hian French club chhuahsanin Saudi club Al Hilal a zawm a, a man zat hi pound maktaduai 77.6 niin, a khelh ṭhat dan a zira sang chho leh thei tura tih a ni bawk - kum hnih atan contract a ziak.

PSG coach thar Luis Enrique chuan Neymar hi a ruahmannaah a telh lo a, hei vang hian Neymar hian French club chhuahsan a dil - a tirah Neymar-a pa chuan hei hi pha mah se, a tawpah erawh a lang chhuak ta tho a, Saudi lamah a puanthuah telin a pem ta.

Neymar hi PSG-in an Ligue 1 match hmasa bera Lorient an hmachhawn ṭum pawhin squad-ah a tel tawh lo a, PSG hian tun nipui transfer-ah Lionel Messi leh Neymar an chân tihna a ni.

Beiseina thar

Saudi-in khawvela footballer langsar ber ber an seng lut mek zel a, a nihna takah chuan he league hi ngaihven loh tum pawhin ngaihven loh theih loh a ni der tawh - superstar chuai tawh lam mai ni loin, an vanglai hun hmang mekte pawh an seng lut tlat.

Neymar chuan, "Europe-ah hlawhtlinna tam tak chharin, hun hlimawm tak ka hmang a, mahse, hmun hrang hranga khelh a, chona thar leh mawhphurhna thar hmachhawn hi chu ka châk reng ṭhin," tiin Saudi a pan chhan a sawi.

Brazil captain chuan sawi zawmin, "Infiamna khawvela thawnthu thar ziah ka duh a, Saudi Pro League hian tun dinhmunah ṭhang zel tura theihna neiin, player ṭha tak tak a kawl bawk.

"Saudi Arabia-ah hian Brazilian player tam tak hman aṭang tawhin an lo khel ṭhin tih ka hria a, chu chuan min hip bawk a ni," a ti a, Saudi a pan chhanah a Brazilian pui an tam vang a nih thu a sawi.

Sum a tam

Neymar-a'n Saudi club a pan chhan hrang hrang a sawi a, a sawi lan loh langsar ber erawh sum a ni - tuna a hlawh ang zat hi hlawh dawn lo se Brazilian forward hian Saudi a pan kher lo ang.

Kum 31 mi Neymar hian PSG-ah khan kum khatah £21.6mtd a hlawh nia sawi a ni a, Al Hilal-ah hian kum khatah £129.2mtd a hlawh dawn niin an sawi - PSG-a a hlawh aiin a let ruk velin a tam tihna a ni a, a nep lo hle.

Khawthlang media ṭhenkhat chuan Neymar hian a hlawh bakah hamṭhatna dang tam tak a dawng tel dawn niin an sawi. An tarlan dan chuan Barcelona forward hlui hi a zin veivahna tur private jet chhawpsak a ni dawn a, football-ah a rilru a pek theih nan in lian tak chenna tur pek niin, staff tam takin an enkawl bawk ang!

Hei chauh a ni lo - Al Hilal-in hnehna an chan apiangin bonus £68,553 (Rs. 72,61,299) a dawng dawn a, social media lamah Saudi Arabia promote-na lam hawi a post a nih chuan $500,000 zel a dawng dawn bawk.

Mangṭha Neymar

Neymar hian kum 2017 khan Barcelona chhuahsanin PSG a zawm a, hetihlaia a man zat hi £200mtd niin, khawvela footballer man to ber a ni a, vawiin thlengin hetiang man zat footballer dang hi an la awm leh lo - kum ruk hnuah pound maktaduai 70 chuangin a chhuak leh ta.

PSG a pan hnuah hlawhtlinna tam tak chharin, Ligue 1-ah vawi nga an champion a, Coupe de France (3), Coupe de la Ligue (2) leh Trophee des Champions (3)-ah te nomawi a chawi a, mahse, an duh ber Champions League nomawi erawh a chawipui thei lo.

Champions League 2019-20 season-ah khan final an lut a, mahse, final-ah hian Bayern Munich ngam loin an tlawm. Neymar-a'n European champion nihpui loin PSG a chhuahsan a, a thlirkir apiangin a ui ber zinga mi a ni reng ang.

PSG president Nasser Al-Khelaifi chuan, "Neymar te ang player ropui, khawvela a ṭha ber pawl mangṭha hi chu a harsa ṭhin hle. Paris St-Germain a rawn pan ni kha ka theihnghilh tawh dawn lo a, kum ruk liam taa he club leh kan hmachhawp atana a hnathawhte ka hre reng tawh ang," a ti.

Al Hilal an ṭha

January khan Manchester United legend Cristiano Ronaldo chuan Al Nassr zawmin, Saudi football-in ngaihven a hlawh ṭan a, an sum thehchhuah a tam ṭhin bawk avangin footballer tam takin an hnar phal lo - tunah chuan Dutch league, Serie A leh Ligue 1 te ai chuan 'star' an tam tawh zawk hial mai thei!

Al Hilal ringawt pawh hian star player an kawl hnem hle - Neymar hma hian Wolves captain hlui Ruben Neves, Chelsea centre back Kalidou Koulibaly leh Lazio thiampuipa Sergej Milinkovic-Savic te chu an lo la lut tawh.

Kum 26 mi Malcom pawh a lakluh nan pound maktaduai 60 chuang an seng a, an player kawl sa zingah Matheus Pereira hi West Brom tana Premier League khel tawh niin, Moussa Marega hi Porto striker hlui a ni a, kum 27 mi forward Michael hi kum 2019-a Brazilian Serie A player chhuak thar ṭha bera thlan kha a ni.

A tawi zawnga sawi chuan Al Hilal hi European football-ah pawh inlan se, an ngaihtuahawm lo mai ang em, tih tur khawpin an squad a chhah ṭha tawk a, he kawng hi Saudi club tam zawkin an pan mek.

Hello Neymar

Neymar hian PSG tan match 173 khel hmanin goal 118 a khungsak a, assist vawi 77 a nei. Ligue 1 Player of the Year-ah ṭum khat thlan a ni a, Team of the Year-ah vawi thum a lang bawk.

Al Hilal chairman Fahad bin Saad chuan, "Khawvel huap pawha hriat hlawh, tlarhma lama dan ngaihna awm lo," tiin an player thar chu a lo lawm a, Neymar-a'n chona thar a hmachhawn dawn.

Tarlan tawh ṭhin angin Saudi-ah Neymar a mikhual dawn lo. A hma hian Al Hilal tana a khelhpui turte bakah Karim Benzema, N'Golo Kante, Jordan Henderson, Ruben Neves, Sadio Mane, Roberto Firmino leh Riyad Mahrez te hoin Saudi an pan tawh.

Manchester City manager Pep Guardiola chuan, "Nakinah chuan hei aia tam zawk hian an la pan dawn a, club-te kan fimkhur a ṭul. Engtia rei nge Saudi hian an tih theih ang, ka hre lo a, mahse, ka ngaihdanah chuan hetiang hi a nih reng tawh ka ring," tiin a lo sawi tawh a ni.