Ben Stokes-a'n Cricket World Cup khel dawn

Ben Stokes chuan ODI cricket chawlhsan tawh mah se Cricket World Cup khel turin a rawn kir a, England ODI squad-ah telh nghal a ni.

England hian August 15, Nilaini khan September thlaa New Zealand hmachhawn tur player 15 awmna squad an puang a, Ben Stokes hi a tel. World Cup khel tur England squad-ah pawh a tel ang.

Kum 2019 khan England chuan a vawi khat nan World Cup nomawi an chawi a, all rounder Stokes hi final-ah man of the match-ah an thlang.

Nikum nipui khan Stokes hian ODI a chawlhsan a, Test leh T20 erawh a khel chhunzawm. Nikum November thlaa T20 World Cup-a England champion ṭumah pawh Stokes hi player pawimawh a ni bawk.

England hian New Zealand nen T20 Series leh ODI series match li ve ve an khel dawn a, Stokes hi T20 squad-ah erawh telh a ni lo. India rama khelh tur Cricket World Cup-ah England hian New Zealand hi an hmachhawn hmasa ber dawn a, October 5 hian Narendra Modi Stadium-ah an inkhel ang.