Laporte-a'n Al Nassr a zawm hnai

Saudi Pro League zawm tur player langsar an pung zel a, Al Nassr-in Manchester City aṭangin Aymeric Laporte an la lut dawn. Spain international defender Laporte chungchangah City leh Saudi club hi an inrem tawh a, a man zat tur hi puanzar a ni lo.

Kum 29 mi Laporte hian season liam ta khan khelhna hmun a chang pha meuh lo a, City-in RB Leipzig aṭanga euro maktaduai 90 (£77m)-a Josko Gvardiol an lakluh avangin khelhna hmun chan a harsa lehzual dawn.

Laporte hian January 2018 khan Athletic Bilbao aṭangin pound maktaduai 57-in Man City hi a zawm a, Pep Guardiola-a'n City ṭha zawk a dinna kawngah player pawimawh a ni. Season tluana a khelh hmasak berah Laporte hian match 35 a khel a, team innghahna a ni. Tunah erawh player pawimawh a ni pha tawh lo a, season liam ta khan league match 12-ah chauh a inlan.

Premier League ṭan nia City-in Burnley an hneh ṭum khan Laporte hi minute 79-naah a lut a, hei hi Citizens tana a inlan hnuhnung berah a ngaih theih. Nizan khan City-in UEFA Super Cup-ah Sevilla an hmachhawn a, result kan hre hman lo.

Laporte la luttu Al Nassr hian January khan Cristiano Ronaldo an la lut. Al Nassr hi Newcastle United neitu Saudi Arabia Public Investment Fund (PIF) hnuaiah tho an awm a, PIF hnuaiah hian Saudi club dang Al-Ittihad, Al-Hilal leh Al-Ahli te an tel bawk.

PIF enkawl club-te hian sum an seng nasa a, Al Nassr hian tun nipuiah ringawt Sadio Mane, Marcelo Brozovic, Alex Telles leh Seko Fofana te an la lut tawh a ni.