De Bruyne a chawl rei dawn

Manchester City midfielder Kevin De Bruyne chu Premier League match hmasa bera Burnley an hneh ṭumin a malpuiah hliam a tuar a, kumin chhung chawl thei dinhmunah a ding.

Kum 32 mi De Bruyne hi minute 23 lekah lakchhuah a ni a; Thawhṭanni khan a dinhmun a enfiah niin thla li tal a chawlh a ngaih a rinawm.

City lam chuan Belgian midfielder hi a inhliamna ngaia a inhliam nawn tawh loh nan zai mai an duh a, thutlukna erawh an la siam lo. Hlawhtling taka an zai a nih pawhin nakkum kumtir lamah chauh a rawn let thei ang.

Fimkhur a ṭul

City fapa rangkachak De Bruyne hi kum 32 mi a ni tawh a, khelmualah la vul reng mah se hliamin a tibuai ve reng.

Kumin UCL final-ah khan De Bruyne hi hliam vang thoin lakchhuah a ni a, hemi hnu hian chawl rengin pre season-ah pawh a inlan lo. Community Shield-ah De Bruyne hi second half-ah a rawn inlan leh chauh a, UCL final zawha inkhel bul a ṭan leh hmasak berah a inhliam nghal.

Chutihrualin De Bruyne hian season liam ta tawp lam thla hnih chhung chu malpui hliam chungin a khel a, tunah a nghawng a lang. Pep Guardiola chuan, "Thla 3-4 chu a chawlh a ṭul dawn. Zai a ṭul dawn em, tih pawh ngaihtuah a ngai. Thutlukna siam hmain doctor, physio bakah amah rawn a ṭul ang," tiin a sawi.

City-in season liam taa nomawi lian pathum UCL, Premier League leh FA Cup an chawi ṭum khan De Bruyne hian goal 10 bakah assist vawi 31 a nei a, danglamna thlen thei player a nih avangin a chungchanga thutlukna pawh uluk taka siam a ṭul ang.

A thlak theih loh

Man City tana De Bruyne pawimawhzia chu inkhel en thiam chin chuan an hrethiam vek a, Belgian midfielder a awm lo a nih chuan Erling Haaland-a tan pawh goal khung a harsa sawt thei ang.

Pep Guardiola chuan, "De Bruyne inhliam kan tan chuan a pawi hle. Player theihna sang bik a ni a, match hnih khat chu a tel loin khel thei mah ila hun rei tak a tel loa khelh chu a harsa dawn. A theihna ang nei player dang an awm loh avangin thlak theih a ni lo," tiin a sawi.

Chutihrualin Pep hian City legend Sergio Aguero chu thlak theih loh a nih thu a sawi tawh a, Argentine striker hmun ruak hi Erling Haaland-a'n a hnawh khat hneh hle.

Spanish manager Pep chuan, "Player theihna inang lo tak tak kan nei a, tun hi an tan hun ṭha a ni ang. Inhliam a an awm chuan player dang tan hun ṭha a ni a, hei hi khawvel kalphung a ni. Thil awm dan kan en ang a, nipui bazar thil thlen theih dan kan chhut tel ang," tiin a sawi.

A thlak dan tur

City hian Ilkay Gundogan an chân a, midfield-a chhawr tlak nghal tur Mateo Kovacic an la lut. Pep-a'n mifield laiah player pathum a hmang tlangpui a, striker thlawptu chhiar tel chuan midfielder pangaah a chhiar theih.

Tun dinhmunah Rodri chu khawih chet theih loh a ni a, player dang erawh thlak kual theih an ni thung. Season liam ta kha chuan John Stones-a'n midfield hna a rawn thawk hnem a; Bernardo Silva, Phil Foden, Gundogan, Jack Grealish, Julian Alvarez leh Riyad Mahrez te an lut hnem bawk.

Kuminah Gungodan bakah Riyad Mahrez te an awm tawh lo a; inhliam KDB chhiar telin rinrawl pathumin an kiam tihna a ni. Hemi a nih avang hian Kovacic ringawt hi chu player pathum hmun ruak hnawh khat tur chuan a tawk lo.

Hei vang hian club academy chhuak Cole Palmer leh Rico Lewis te an rawn chet ṭhat a ṭul dawn. Season liam taa besei pha lo Kalvin Phillips a insiamrem a ngai tawh bawk. City hian player chhuak pahnih leh KDB thlakna tur ngawr ngawr chu an neiah a ngaih theih.

Mahse, Pep hian risk a lak a rinawm loh avangin nipui bazarah player an lak belh a rinawm zawk. City hi Lucas Paqueta nen sawizawm a ni a, KDB an chân avangin Brazilian midfielder hi an chuh na sawt ang.

Thlirna dang lehah chuan City hian kum ruk chhungin Premier League nomawi panga an chawi a, inelna an thunun mah mah. De Bruyne a inhliam zarah Premeir League nomawi inchuhna a nun phah thei bawk.