Chanmari FC-in jersey an tlangzarh

MPL club hung ber zinga mi Chanmari FC chuan August 15, Thawhlehni zan khan Chanmari YMA Hall-ah tun seaosn-a an hak tur jersey chu an tlangzarh a, Livaah Innovations CEO Pratik Lokhande-a'n a tlangzarh a ni.

MPL-a vawi hnih champion tawh Chanmari hi Bengaluru khawpui a innghat, Electronics Design-Engineering company Livaah Innovations te nen tun season atan an thawk ho. Livaah Innovations CEO Pratik Lokhande chuan, "Chanmari FC hi Mizoramah an langsar tih kan hria a, kan thawk ho thei hi kan lawm hle. Mizoram chhunga kan company tihlarna ṭha tak an ni dawn a, MPL-ah pawh result ṭha tak an neih theih nan duhsakna ka hlan," tin a sawi.

Chanmari FC hi tun season-ah Home Mission School nen an thawk ho dawn a, MPL U17-ah Home Mission hian Chanmari ai an awh ang. Club president Vanlalruatfamkima chuan, "Thawhpui ṭha tak kan neih avangin kan lawm a, champion leh ngei kan tum dawn a ni," tiin a sawi ve bawk.

CFC hruaitu hlun R. Zatawna'n away jersey a tlangzarh a; MFA OB leh MPL Board secretary ni mek Lalrawngbawla'n fuihna thu pawimawh tak a sawi bawk. Tlangzarhnaah hian hall khat mipui an pungkhawm a; Angelina Paul-i'n jersey tlangzarhna hun hi kaihruaiin zaithiam lar Zai Hauchhum leh Guru Gee ten zaiin mipui an awi a ni.