Chelsea leh Lavia an inrem

An la duhtawk mai lo - Chelsea chuan midfielder thar an lei leh dawn, a hming chu Romeo Lavia a ni. Southampton midfielder Lavia lei nan hian pound maktaduai 53 an pe phawt ang a, pound maktaduai nga danga pung leh thei tur a ni ang.

Kum 19 mi Lavia manah Blues leh Saints an inrem fel tawh. Stamford Bridge-ah eng chena rei nge contract a ziah dawn tih erawh tarlan a la ni lo a, chanchinbu i chhiar meuh chuan a fel hman tawh hial mai thei.

Belgium tana vawi khat inlan tawh Lavia hian season hmasa khan Southampton tan Premier League match 38 a khel vek a, mahse a club hi English football inelna sang ber hmachhawn zel turin a inhamtanpui zo ta lo.

Chelsea hian tun hnaiah Liverpool nena sawi zawm midfielder pahnih an laksak ta tihna a ni. Reds nena inrem tawh Moises Caicedo an leisak a, tunah Jurgen Klopp-a'n lakluh a duh zinga mi Lavia an lei leh dawn ta.

London club hian Caicedo hma hian Brighton aṭangin nikum August thla khan defender Marc Cucurella pawh an lo lei tawh. Seagulls goalkeeper hlui Robert Sanchez leh Caicedo te bakah an coach Graham Potter hial pawh an lo chhuhsak tawh bawk a ni.